מיסיל סיסטעמען און שווערע מיליטערישע וואפן אויפגעשטעלט ארום פרעזידענט טראמפ'ס מאר-א-לאגא רעזידענץ אין פלארידע


פרישע "סורפעס-צו-עיר" מיסיל סיסטעמען זענען אראפגעשטעלט געווארן צו היטן די הימלען ארום פרעזידענט טראמפ'ס מאר-א-לאגא רעזידענץ אין פאלם ביטש, פלארידע. די 'נאראד' (NORAD) אגענטור און די אמעריקאנער 'נארדערן קאמאנד' האבן באשטעטיגט אז די לופט-פארטיידיגונג סיסטעמען זענען אינסטאלירט געווארן אויף די דירעקטע פארלאנג פון די סיקרעט סערוויס. טייל פון די עקוויפמענט איז פלאצירט געווארן אויף א שיף אין די אינטערקאוסטעל וואסער-וועג נעבן די רעזידענץ, און נאך וואפן זענען אראפגעשטעלט געווארן נעבן די דאנאלד דזשעי. טראמפ אינטערנאציאנאלע עירפארט.


לויט באריכטן רעדט מען פון "עווענדזשער" יוניטס, וואס זענען האמווי טראקס אנגעפילט מיט לאנטשערס וואס טראגן 'סטינגער' מיסילס, ספעציעל געבויט אראפצושיסן נידריג-פליענדיגע פליגערס, העליקאפטערס און דראונס. די נארדערן קאמאנד שטעלט אויך צו ספעציעלע אנטי-דראון עקוויפמענט, אין די צייט וואס די סיקרעט סערוויס זאגט אז זיי פירן ווייטער אן זייערע אפעראציעס אונטער א צושטאנד פון געהעכערטע זיכערהייט דראונגען.


דער דראסטישער שריט קומט נאך כסדר'דיגע פארלעצונגען פון די פארבאטענע לופט-רוים ארום פאלם ביטש. לאקאלע באריכטן געבן אן אז מער ווי 60 פליגערס זענען שוין אפגעשטעלט געווארן נעבן די רעזידענץ זינט יאנואר 2025. דער לעצטער אינצידענט איז פארגעקומען דעם 24'סטן אקטאבער, ווען אן F-16 קאמפס-פליגער האט אינטערסעפטעד א ציווילע פליגער וואס איז אריינגעפארן אינעם פארבאטענעם זאנע. דאס קומט אויך נאכדעם וואס נאראד האט אפגעהאלטן א פאראויס-געפלאנטע לופט-פארטיידיגונג איבונג איבער פאלם ביטש דעם 14'טן אקטאבער.


באאמטע האבן נישט געוואלט ארויסגעבן קיין דעטאלן צי א ספעציפישע סטראשע האט געפירט צו דעם שריט, ווי לאנג די סיסטעמען וועלן דארט בלייבן, אדער וויפיל עס קאסט אפ, אנגעבנדיג זיכערהייט סיבות פארן האלטן די אינפארמאציע געהיים.


טייל ארטיגע איינוואוינער האבן אויסגעדרוקט אומבאקוועמליכקייט צו זען אזעלכע שווערע מיליטערישע וואפן אזוי נאנט צו זייערע היימען. פון די אנדערע זייט זאגן זיכערהייט עקספערטן אז דראונס פאדערן פארטיידיגונגס-מיטלען פיל נענטער צו דער ערד ווי די געווענליכע פלי-פארבאטן קענען צושטעלן.


אין די זעלבע צייט זענען דא באריכטן אז וואשינגטאן באטראכט די מעגליכקייט צו מאכן א פערמאנענטע פארבאטענע לופט-רוים איבער פאלם ביטש, אבער באאמטע האבן דאס דערווייל נישט באשטעטיגט.