היסטארישע אייזערנע טויערן געגנבעט פון אידישע בית החיים אין מאנטענע
היסטארישע טויערן גע'גנב'עט פון אן אלטע אידישע בית החיים אין מאנטענע
די פאליציי אין העלענע, מאנטענע, פארשן אויס אן אינצידענט וואו עס זענען גע'גנב'עט געווארן די היסטארישע אייזערנע טויערן פונעם ארטיגן אידישן בית החיים "האום אוו פיעס", א בית החיים וואס איז געגרינדעט געווארן מיט כמעט 160 יאר צוריק.
די טויערן, וואס זענען אינסטאלירט געווארן נאך אין יאר 1910, זענען מיט געוואלד אראפגעריסן געווארן פון אונטער דעם שטיינערנעם אריינגאנג פונעם בית החיים. לויט באריכטן האט מען געפונען אויפן ארט צובראכענע הענג-אייזנס און אנדערע מעטאלענע טיילן, וואס צייגט וויאזוי די גנבים האבן עס ברוטאל אראפגעריסן.
מען גלייבט אז די גניבה איז פארגעקומען דעם אוונט פון אקטאבער 27. פארטרעטער פונעם בית החיים האבן אויסגעדרוקט גרויס זארג און ווייטאג איבער דעם פארלוסט פון די היסטארישע טויערן, וואס זענען געשטאנען ביים אריינגאנג פאר מער ווי א יארהונדערט.
די לאקאלע פאליציי פארשט אויס דעם אינצידענט. דערווייל איז נאכנישט באשטעטיגט געווארן קיין מאטיוו אונטער די גניבה, און עס בלייבט אומקלאר צי דאס איז געווען א דירעקטע אנטיסעמיטישע אטאקע געצילט קעגן דעם אידישן בית החיים, אדער סתם א גניבה פאר די מעטאל.
