ווידעא צייגט: חותי רעבעלן אין תימן שטאלצירן מיט א פארכאפטע אמעריקאנער-געמאכטע געפאנצערטע מיליטערישע טרעקל


א פרישע ווידעא וואס איז פארשפרייט געווארן צייגט ווי חותי קעמפער אין תימן שטאלצירן מיט א פארכאפטע אמעריקאנער-געמאכטע "אשקאש M-ATV", א ספעציעלע געפאנצערטע טרעקל וואס איז געבויט צו באשיצן טרופן פון ראוד-סייד באמבעס, מינעס און אמבושעס. די ווידעא, וואס איז רעקארדירט געווארן אין א נעפליגע און שטיינערדיגע טעריין, צייגט דעם טרעקל פון אינעווייניג און אינדרויסן, באגלייט מיט אראבישע געזאנגען, און מען קען זען ווי א קעמפער שטייט אויפ'ן דאך פונעם טרעקל און הייבט אויף אן אנטענע אין א צייכן פון זיג.


אינטערעסאנט איז, אז דאס טרעקל איז ארגינעל געבויט געווארן צו באשיצן די קרעפטן וואס קעמפן קעגן די חותים, אבער יעצט איז עס געווארן א טייל פון זייער אייגענע ארסענאל. לויט באריכטן, איז דאס טרעקל געווען צווישן די עקוויפמענט וואס די חותים האבן פארכאפט פון די סאודי-געשטיצטע תימן'ער רעגירונג קרעפטן דורכאויס זייער אפענסיווע ביים מערב בארטן, בפרט ארום די פארט שטאט 'מאכא' ביים רויטן ים.


די חותים האבן פארכאפט די שטאט מאכא דעם 10'טן סעפטעמבער נאך א שנעלע אפענסיווע לענגאויס דעם בארטן, און ווידעאס פון יענע געגנט האבן טאקע געצייגט די M-ATV טרעקלעך צווישן די פארכאפטע פליטע. דערווייל איז נישט דא קיין אומאפהענגיגע באשטעטיגונג פונקטליך וויפיל אזעלכע טרעקלעך זענען פארכאפט געווארן אדער אין וואספארא צושטאנד זיי געפינען זיך.


דאס איז אבער נישט דאס ערשטע מאל וואס אזעלכע טרעקלעך פאלן אריין אין די הענט פון די רעבעלן; אין פריערדיגע שלאכטן האט מען שוין געזען M-ATV טרעקלעך מיט די צייכנס פון די סאודישע נעשאנעל גארד אין די הענט פון די חותים. די פראנט ליניעס רוקן זיך אבער כסדר, און די תימן'ער פארטיידיגונגס מיניסטעריום האט שוין זינט דאן געמאלדן אז די רעגירונג קרעפטן האבן צוריק איינגענומען די שטאט מאכא.


עקספערטן שטרייכן אונטער אז די ווידעא איז קלאר געמאכט געווארן אלס פראפאגאנדע צו צייגן אז די חותים האבן דעם מאמענטום, און עס בלייבט אן אפענע פראגע ווי שטארק דאס שפיגלט באמת אפ דעם רעאלן באלאנס פון קראפט אין די תימן'ער ברודער-קריג.