שטורעם אין ארץ ישראל: אפענער געפעכט צווישן בן גביר און פאליציי קאמישענער איבער ברוטאלע פאליציי קראפט קעגן חרדי'שע פראטעסטירער


אן אפענער קאנפראנטאציע האט אויסגעבראכן מאנטאג, נאוועמבער 2, צווישן דעם נאציאנאלע זיכערהייט מיניסטער איתמר בן גביר און פאליציי קאמישענער דניאל לוי, נאך באשולדיגונגען אז הויכראנגיקע פאליציי אפיצירן האבן פארארדנט צו נוצן איבערגעטריבענע קראפט קעגן חרדי'שע פראטעסטירער וועלכע האבן דעמאנסטרירט קעגן גיוס בני ישיבות.


דער געפעכט קומט נאך א רייע שטורמישע פראטעסטן אין ירושלים, בית שמש, און נעבן בני ברק, וואו דעמאנסטראנטן האבן זיך אנגעשטויסן מיט די פאליציי ביי מחאות קעגן דעם ביטערן גזירת גיוס.


בן גביר האט באשולדיגט דעם פאליציי קאמישענער אז ער האט פערזענליך געהייסן פאר די אפיצירן צו פארשטארקן זייער ברוטאליטעט קעגן די דעמאנסטראנטן. דער קאנפליקט איז נאך מער פארהיצט געווארן נאכדעם וואס בן גביר האט אריינגעגעבן א דרינגענדע פעטיציע צום העכסטן געריכט (בג"ץ), פאדערנדיג צו אראפנעמען א צייטווייליגע פארארדענונג וואס באגרעניצט זיין אריינמישונג אין געוויסע פאליציי אפעראציעס. אין די געריכטליכע פאפירן האט בן גביר אנגעוויזן אז לוי האט דירעקטירט די אגרעסיווע פאליציי טאקטיקן, אריינגערעכנט דאס נוצן 'סטאן גרענאדן'.


פאליציי קאמישענער לוי האט שארף אפגעווארפן די באשולדיגונגען, אנרופנדיג זיי "אומבאגרינדעט", און האט זיך אנגענומען פאר די פאליציי'ס רעאקציע צו די פראטעסטן. ער האט געלייקנט אז ער האט ארויסגעגעבן סיי וואספארא אומפאסיגע אינסטרוקציעס, טענה'נדיג אז די אפיצירן האבן בלויז געטון זייער פליכט צו אנהאלטן פובליק ארדענונג.


די באשולדיגונגען קומען נאך די שווערע קאנפראנטאציעס ביים גהה אינטערסעקשאן נעבן בני ברק דעם 29'סטן אקטאבער, ווען די פאליציי האט גענוצט שווערע מיטלען צו צעטרייבן די חרדי'שע פראטעסטירער. ווידעא קליפס פון די פראטעסטן האבן געוויזן אנגעצויגענע סצענעס צווישן פאליציי און פראטעסטירער, אריינגערעכנט דאס ווארפן סטאן גרענאדן צו קלירן די פארשפארטע גאסן.


לויט די פאליציי זענען דריי אפיצירן פארוואונדעט געווארן ביי די אקטאבער 29 פראטעסטן, אינדערצייט וואס איחוד הצלה האט באהאנדלט מער ווי 30 מענטשן, אריינגערעכנט פראטעסטירער און פאליציי אפיצירן. עטליכע פון די פארוואונדעטע האבן געדארפט ווערן אריינגעפירט אין שפיטאל פאר ווייטערדיגע באהאנדלונג.


דער קאנפליקט האט געצויגן שטארקע אויפמערקזאמקייט צו די זארגן איבער די פאליציי'ס אויפפירונג ביי פראטעסטן פון די חרדי'שע קהילה, ספעציעל אין ליכט פון די אנגעצויגענע שטימונג ארום די גיוס געזעצן. דערווייל זענען די באשולדיגונגען קעגן דעם קאמישענער נאך אונטער א דעבאטע, און קיין שום זעלבסטשטענדיגע אויספארשונג האט נאך נישט באשטעטיגט די קלאגעס. דער געפעכט האט אויפגעברענגט ערנסטע פראגעס איבער די באנוץ פון קראפט קעגן חרדי'שע דעמאנסטראנטן, ווי אויך איבער די אנגעצויגענע באציאונגען צווישן די פאליציי פירערשאפט און דעם מיניסטער וואס איז געשטעלט זיי צו קאנטראלירן.