בס"ד

טראגישע העליקאפטער צוזאמענשטויס אין די הימאלייע בערג לאזט איבער איין טויט און עטליכע פארוואונדעט


עס האט פאסירט אין א ברוכטייל פון א סעקונדע, הויך אין די הימאלייע בערג. ארום 8:11 אינדערפרי לאקאלע צייט דעם 3'טן נאוועמבער, האבן צוויי 'עירבאס AS350' העליקאפטערס זיך צוזאמגעשטויסן מיט זייערע פראפעלערס ביים 'פעריטשע' העליפאד אין די עווערעסט ראיאן אין נעפאל. א ווידעא פונעם שרעקליכן מאמענט פארשפרייט זיך יעצט גאר שנעל אומעטום.


א 'פישטעיל עיר' העליקאפטער וואס האט געטראגן טוריסטן פון 'גאראקשעפ', און אן 'עיר דיינעסטי' העליקאפטער וואס האט געטראגן קארגא פון 'לוקלא', זענען אריינגעקומען צו לאנדן פון צוויי אנדערע ריכטונגען, ווען זיי האבן זיך צוזאמגעשטויסן אין דער לופטן הארט בעפארן לאנדן אויף דער ערד. אן אינדיאנער פאסאזשיר איז אומגעקומען אויפ'ן ארט, בשעת א פאסאזשיר פון ניו זילאנד און ביידע פילאטן זענען פארוואונדעט געווארן.


די פראגע וואס יעדער פרעגט יעצט איז, ווי אזוי אזא זאך האט געקענט פאסירן אין די מערסט-פארנומענע צייט פון די טוריסטן סעזאן. דער 'פעריטשע' העליפאד געפינט זיך אויף א הייך פון ארום 4,200 מעטער, און וויבאלד עס איז אן אפגעזונדערטע ארט, האט עס נישט קיין פולע 'עיר טראפיק קאנטראל' דעקונג. דעריבער פארלאזן זיך די פילאטן אויף דירעקטע קאמוניקאציע איינער מיטן צווייטן אויסצומיידן פראבלעמען.


דאס ברענגט ארויף א גרויסע פראגע: ווי אזוי זענען צוויי העליקאפטערס אנגעקומען צום זעלבן לאנדונג זאנע אין די זעלבע צייט? דערווייל איז נאכנישט געמאלדן געווארן קיין אפיציעלע אורזאך, אבער באריכטן געבן אן אז די אויספארשער קוקן אריין צי עס איז געווען א דורכפאל אין די קאמוניקאציע צווישן די פילאטן. די ציווילע אוויאציע אטאריטעט אין נעפאל האט אויסגעדרוקט טיפע טרויער איבער די טראגעדיע, און די רעזולטאטן פון די אויספארשונג קענען מעגליך טוישן דעם גאנצן סיסטעם ווי אזוי די פארנומענע העליפאדס אין די עווערעסט ראיאן ווערן אנגעפירט פון יעצט און ווייטער.