באוואפנטע באן שטוינט קענטאקי: וויירעל ווידעא צייגט אמעריקאנער 'עיברעמס' טאנקען אויפ'ן וועג קיין פוילן


א פראכט באן אנגעפילט מיט אמעריקאנער שלאכט טאנקען האט איבערגענומען די סאשעל מידיא פלאטפארמעס, נאכדעם וואס א ווידעא איז ארומגעפארן ווי מען זעט די באן פארן דורך די קליינע שטעטל לא גרעינדזש, אין קענטאקי. די קליפ צייגט א לאנגע רייע פון די פארגעשריטענע 'M1A2 SEPv3 עיברעמס' טאנקען אויף פלעטקארס, וואס זענען פון די מערסט פארגעשריטענע ווערסיעס פון די באקאנטע אמעריקאנער טאנקען.


לויט די 'וויסעגראד 24' אקאונט וואס האט ארויפגעשטעלט די ווידעא, זענען די טאנקען אויפ'ן וועג קיין פוילן, וואו זיי וועלן זיך בקרוב אנשליסן אינעם פוילישן מיליטער. די ווידעא האט געצויגן ריזיגע אויפמערקזאמקייט אנליין, און צושויער זענען געבליבן געשטוינט פון די מאסיווע סייז פון די שיפמענט וואס פארט אדורך אזא קליין שטעטל אין קענטאקי.


די טיימינג פון די ווידעא שטימט מיט א פיל גרעסערע בילד, וויבאלד פוילן בויעט יעצט אויף די גרעסטע פלאטע פון 'עיברעמס' טאנקען אין גאנץ אייראפע. אין אפריל 2022 האט ווארשע אונטערגעשריבן א ריזיגע קאנטראקט פון ארום 4.75 ביליאן דאלאר צו קויפן 250 פון די נייע 'M1A2 SEPv3' טאנקען. לויט די לעצטע באריכטן זענען שוין 217 שטיק אנגעקומען, און די איבעריגע דארפן ווערן איבערגעגעבן ביז ענדע יאר 2026.


באזונדער האט פוילן אויך איינגעקויפט 116 עלטערע 'M1A1' טאנקען, וואס דאס וועט רוקן זייער טאטאלע 'עיברעמס' פלאטע צו ארום 366 טאנקען ביז ענדע יאר. די טאנקען זענען געצילט פאר די 18'טע מעכאניזירטע דיוויזיע אויף נאטא'ס מזרח פראנט, וואס איז א מעכטיגע אפגרעיד פאר פוילן'ס ערד קרעפטן.


עס איז אבער נאך אלץ אומקלאר פונקטליך וויפיל טאנקען עס זענען געווען אויף די ספעציפישע באן און צו וועלכע שיפמענט עס באלאנגט, וויבאלד די אינפארמאציע איבער די דעסטינאציע קומט בלויז פונעם סאשעל מידיא אקאונט וואס האט עס פובליצירט.