שטורעם אויף סאשעל מידיא נאכדעם וואס דער ניי-ערוויילטער מישיגען סענאטאר רופט אן זיין סטעיט "די קאפיטאל פון אראבישע אמעריקע"


דער ניי-ערוויילטער דעמאקראטישער סענאטאר פון מישיגען, אבדול על-סאיעד, האט ארויסגערופן א כוואליע פון רעאקציעס אויפן אינטערנעט, נאכדעם וואס ער האט געזאגט פאר א פארזאמלונג אז זיין סטעיט איז "די קאפיטאל פון אראבישע אמעריקע".


דער דעמאקראט האט געמאכט די קאמענטארן דעם פארגאנגענעם פרייטאג ביי די 'קאנעקט אראב אמעריקע עמפאערמענט סאמיט' אין טשאנטיללי, ווירדזשיניע, נעבן וואשינגטאן די.סי., בלויז עטליכע טעג נאכדעם וואס ער האט באזיגט זיין רעפובליקאנער קעגנער מייק ראדזשערס מיט ארום זיבן פראצענט אינעם נאוועמבער 3 עלעקשאן.


ער האט אנגעהויבן זיין רעדע זאגנדיג אז עס איז אים אן עהרע צו זיין מישיגען'ס קומענדיגע סענאטאר, און האט אנערקענט אז וואשינגטאן איז די הויפטשטאט פונעם לאנד, אבער האט צוגעלייגט אז מישיגען טראגט דעם טיטל אלס די קאפיטאל פאר די אראבישע אמעריקאנער. די ווערטער צילן צו די גרויסע אראבישע קאמיוניטי אין מישיגען, וואס ווערט געשאצט צו זיין ארום 400,000 מענטשן, הויפטזעכטליך קאנצענטרירט אין די מעטרא-דעטרויט געגנט, וואו די שטאט דירבארן טראגט שוין לאנג דעם צונאמען.


א קליפ פון די רעדע האט זיך גאר שנעל פארשפרייט, און א ווידעא דערפון אויף די 'עקס' פלאטפארמע האט געצויגן מיליאנען וויאוז, מיט שארפע רעאקציעס פון ביידע זייטן פונעם פאליטישן ספעקטרום. קאנסערוואטיווע קריטיקירער האבן שארף אראפגעריסן די קאמענטארן, אינדערצייט וואס זיינע שטיצער זעהן עס אלס א שטאלצע אנערקענונג פאר די קאמיוניטי וואס האט אים געהאלפן געווינען. על-סאיעד, 42 יאר אלט, איז געבוירן געווארן אין מישיגען צו עלטערן וועלכע זענען אימיגרירט פון עגיפטן.


עטליכע קאמענטאטארן האבן אויך אנגעוויזן אז לויט די אפיציעלע נומערן האט קאליפארניע א גרעסערע אראבישע באפעלקערונג ווי מישיגען, כאטש די סאוט-איסט מישיגען געגנט איז די מערסט קאנצענטרירטע אראבישע צענטער אינעם לאנד. די גרויסע פראגע וואס פילע פרעגן יעצט איז, ווי אזוי דער ניי-ערוויילטער סענאטאר וועט באלאנסירן זיין שטארקע אידענטיטעט אינאיינעם מיט'ן רעפרעזענטירן אלע איינוואוינער פון מישיגען ווען ער וועט אפיציעל איבערנעמען זיין אמט.