בס"ד

מדינת ישראל פירמע שטעלט פאר נייע 'סי דעמאן' מיני קרוז מיסיל פאר נעיווי פלאטעס


די 'מדינת ישראל עראספעיס אינדוסטריעס' (IAI) פירמע קומט ארויס מיט אן אינטערעסאנטע אפער פאר נעיווי פלאטעס איבער די וועלט, שטעלנדיג פאר זייער נייע 'סי דעמאן' (Sea Demon) מיני קרוז מיסיל. די פירמע באשרייבט די נייע וואפן אלס א 'נעקסט-דזשענערעישאן' מיסיל וואס איז סיי פארגעשריטן און סיי ביליג. די מיסיל איז ספעציעל דיזיינט פאר אזוי-גערופענע "סעטורעיטעד" אטאקעס - דאס הייסט צו שיסן א גרויסע צאל מיסילס אויף איין מאל כדי איבערצוקומען און צומישן דעם פיינט'ס פארטיידיגונגס סיסטעמען.


דער הויפט מעלה פון די נייע וואפן איז איר קליינע סייז. לויט די באריכטן קען איין נעיווי שיף טראגן אזויפיל ווי 32 לאנטשערס, וואס גיט א ריזיגע מאס פייער-קראפט אין א גאר קליינע פלאץ אויפ'ן דעק פונעם שיף. IAI זאגט אז די מיסיל קען פליען און טרעפן א טארגעט ביז 250 קילאמעטער ווייט, וואס ערלויבט פאר די שיפן צו אטאקירן פונדערווייטנס און בלייבן אינדרויסן פון די געפאר זאנע פון רוב סטראשונגען.


די 'סי דעמאן' איז געבויט אויף די טעכנאלאגיע פון די 'ווינד דעמאן' מיסיל פאמיליע, וואס די פירמע האט צום ערשט געוויזן אין יאר 2024 אלס א לייכטערע און ביליגערע אלטערנאטיוו צו די גרויסע און טייערע קרוז מיסילס. דער געדאנק אונטער דעם איז פשוט: אין מאדערנע מלחמות נוצט מען אויס ריזיגע קוואנטומס פון וואפנס גאר שנעל, דעריבער איז די פרייז פונקט אזוי וויכטיג ווי די פינקטליכקייט פונעם מיסיל.


דערווייל קומען רוב פון די ציפערן און דעטאלן נאר פון די פירמע זעלבסט, און IAI האט נאכנישט ארויסגעגעבן קיין פונקטליכע פרייז וויפיל יעדע מיסיל וועט קאסטן. די אלע קלעימס וועלן נאך דארפן ווערן אויסגעפרובירט דורך די קונים און אומאפהענגיגע עקספערטן. עס בלייבן נאך עטליכע פראגעס ארום די נייע מיסיל, אריינגערעכנט וויפיל עס וועט קאסטן, וועלכע לענדער וועלן דאס קויפן פאר זייערע נעיוויס, און ווי גוט עס וועט זיך ספראווען קעגן מאדערנע דעפענס סיסטעמען. אבער ווי עס זאל נאר נישט זיין, ווייזט דאס ווי שנעל די וועלט פון נעיווי מלחמות רוקט זיך אין די ריכטונג פון קלענערע און ביליגערע מיסילס וואס ווערן געשאסן אין גרויסע מאסן אויף איין מאל.