בס"ד

האנדא רופט צוריק איבער 635 טויזנט קארס צוליב א סכנה'דיגע פראבלעם מיט די 'פאוער סטירינג'

די קאר פירמע 'האנדא' האט געמאלדן א ריזיגע ריקאל אויף 635,808 קארס איבער די פאראייניגטע שטאטן, נאכן אנטדעקן א סאפטווער פראבלעם וואס קען פלוצלינג אפשטעלן די 'פאוער סטירינג' הילף אינמיטן דרייוון, וואס קען חלילה פירן צו אן עקסידענט.


די ריקאל נעמט אריין געוויסע 2023-2025 האנדא פיילאט (Honda Pilot) עס-יו-ווי'ס, 2022-2024 עקיורא עם-די-עקס (Acura MDX) עס-יו-ווי'ס, און 2021-2025 עקיורא טי-על-עקס (Acura TLX) סעדאן קארס.


לויט דאקומענטן וואס זענען אריינגעגעבן געווארן צו די נאציאנאלע הייוועי טרעפיק סעיפטי אדמיניסטראציע (NHTSA), קען די עלעקטראנישע פאוער סטירינג סיסטעם אריינגיין אין א 'פעיליסעיף' (failsafe) מאוד אונטער געוויסע אומשטענדן. ווען דאס פאסירט, לעשט זיך אויס די פאוער סטירינג און עס צינדט זיך אן א ווארענונג לעמפל אויפן דעשבאורד. כאטש דער דרייווער פארלירט נישט אינגאנצן די מעגליכקייט צו קאנטראלירן דעם קאר, פאדערט עס אבער אסאך מער כוח צו דרייען דעם סטירינג וויל, וואס קען מאכן שווער צו קאנטראלירן דעם קאר, בפרט אין א פאל וואס מ'דארף מאכן א שנעלע מאנעוורע.


דער פראבלעם שטאמט פון א טעות אין די קאלקולאציע פונעם קאר'ס 'דרייווער אטענשאן מאניטאר' סיסטעם, וואס קען גורם זיין אן אינערליכע פעלער און אפשטעלן די עלעקטראנישע הילף פונעם סטירינג. ביז אקטאבער 22 האט האנדא באקומען 146 וואראנטי קלעימס און באריכטן איבער איין פארוואונדעטע פערזאן צוליב דעם פראבלעם, אבער ברוך השם קיין פאטאליטעטן זענען נישט באריכטעט געווארן. די ריקאל איז רעגיסטרירט געווארן אונטער די NHTSA קאמפיין נומער 26V721000, און עס נעמט אריין אלע 635,808 קארס אין דעם קאמפיין.


האנדא וועט פארראכטן דעם פראבלעם דורך די לאקאלע אטאריזירטע דילערשיפס, וועלכע וועלן אינסטאלירן אן אפדעיטעד סאפטווער אינעם פאוער סטירינג קאנטראל יוניט, און די ריפער וועט געמאכט ווערן אינגאנצן בחינם. בריוו צו די אייגנטומער פון די קארס וועלן אנהייבן ארויסגעשיקט ווערן דעם 14'טן דעצעמבער 2026. דערווייל קענען קאר אייגנטומער אנהייבן זוכן זייער 'ווין נומער' (VIN) אויף די אפיציעלע NHTSA ריקאל וועבזייטל אנגעהויבן פון נאוועמבער 11, צו זען אויב זייער קאר איז אריינגערעכנט אין די ריקאל.


די יעצטיגע ריקאל ברענגט ארויס די זיכערהייט ריזיקעס וואס סאפטווער פראבלעמען קענען אנמאכן אין מאדערנע קארס, בפרט ווען עס אפעקטירט וויכטיגע דרייווינג סיסטעמען ווי די סטירינג.