אנגעצויגנקייט אין די אדמיניסטראציע: טרעזשערי סעקרעטערי קריטיקירט קאמערס דעפארטמענט איבער כינע'ס צוטריט צו אמעריקאנער 'עי-איי' טשיפס


טרעזשערי סעקרעטערי סקאט בעסענט האט אויסגעדרוקט שטארקע פראסטראציע קעגן קאמערס סעקרעטערי האוערד לאטניק, איבער דעם וואס ער האט נאכנישט ארויפגעשטעלט די סינגאפור-באזירטע קאמפאני "מעגא-ספיד אינטערנעשענאל" (Megaspeed International) אויף די שווארצע ליסטע פון די אמעריקאנער רעגירונג, א שריט וואס וואלט אפגעהאקט די קאמפאני פון צוטריט צו אמעריקאנער טעכנאלאגיע.


בעסענט האט אנטפלעקט אז ער, אינאיינעם מיט סעקרעטערי אוו סטעיט מארקאו רוביאו, דיפענס סעקרעטערי פיט העגסעט, און אנדערע הויכראנגיגע אדמיניסטראציע באאמטע, שטיצן שוין פאר עטליכע מאנאטן דעם פלאן צו בלעקליסטן די קאמפאני. דאס קומט צוליב ערנסטע פארדאכטן אז פארגעשריטענע 'עי-איי' (AI) טשיפס פון די 'נווידיע' (Nvidia) קאמפאני ווערן דורכגעשווערצט קיין כינע דורך די דאזיגע פירמע. טראץ דעם, האט די קאמערס דעפארטמענט - וואס איז פאראנטווארטליך אויף די פראצעדור - נאכנישט גענומען די נויטיגע שריט.


רעדנדיג איבער דעם סקאנדאל, האט בעסענט געזאגט: "איך בין פראסטרירט, ספעציעל ווען פרעזידענט טראמפ האט קלארגעשטעלט אז כינע טאר נישט באקומען קיין שום נווידיע טשיפס וואס זענען העכער פון די H100 מאדעלן." ער האט צוגעלייגט אז סיי וועלכע רינונג פון באגרעניצטע טעכנאלאגיע איז "זייער פראסטרירנד, ווייל עס טשעפעט אונזערע גרויסע קאמפאניס אינעם 'עי-איי' פארמעסט, און עס גיט פאר די כינעזער אן אויבערהאנט."


אין צענטער פונעם שטורעם געפינט זיך "מעגא-ספיד אינטערנעשענאל", א טעכנאלאגיע פירמע אין סינגאפור, וואס האט לויט באריכטן איינגעקויפט נווידיע 'עי-איי' טשיפס און הארדווער אין ווערד פון קרוב צו 5 ביליאן דאלאר אין די לעצטע יארן. דאס קומט אין די זעלבע צייט וואס זיי שטייען אויס קלאגעס אז טייל פון די פראדוקטן זענען אומלעגאל אריבערגעפירט געווארן צו כינעזער קאסטומערס.


די קאמפאני האט אויך געצויגן אויפמערקזאמקייט צוליב איר געוועזענע עקזעקיוטיוו און הויפט שעירהאלדער, עליס הואנג, וועמען די אמעריקאנער שפיאנאזש אגענטורן פארדעכטיגן אין האבן פארבינדונגען מיט די כינעזער אינטעלידזשענס. די באשולדיגונגען האבן געברענגט נאך מער אויפמערקזאמקייט נאך די אנטפלעקונגען איבער איר נאנטע פארבינדונג מיט דעם נווידיע סי-אי-או (CEO) דזשענסען הואנג, וועלכער האט געמאלדן זיין רעזיגנאציע אינמיטן דעם סקאנדאל.


פון איר זייט האט מעגא-ספיד געלייקנט אז זיי האבן פארלעצט עקספארט קאנטראל געזעצן. די סינגאפורער אויטאריטעטן האבן קלארגעשטעלט אז זייער אויספארשונג האט נישט אויפגעוויזן אז עליס הואנג זאל האבן באגאנגען שפיאנאזש אדער די פארדעכטיגטע סערווער-דעקלאראציע פארברעכנס. סינגאפור האט אבער אנגעוויזן אז זייער אויספארשונג קעגן מעגא-ספיד און עטלעכע אינדיווידועלן גייט נאך אן.


דער אנגייענדער קאנפליקט ברענגט ארויף ערנסטע פראגעס איבער די אינפארסירונג פון עקספארט קאנטראל, רעגירונג איבערזיכט, און די זיכערהייט פון אמעריקע'ס 'עי-איי' אינדוסטריע, אין א צייט וואס וואשינגטאן זוכט מיט אלע כוחות צו פארמיידן כינע פון באקומען צוטריט צו פארגעשריטענע אמעריקאנער טעכנאלאגיע.