אלטע ווידעא קליפ ווי פוטין לויבט טראמפ און ווארנט איבער זיין זיכערהייט צירקולירט ווידער אויפן אינטערנעט


א ווידעא קליפ פונעם רוסישן פרעזידענט וולאדימיר פוטין, אין וועלכע ער לויבט אויס דאנאלד טראמפ אלס א קלוגער און ערפארענער פירער, אבער ווארנט אז ער איז "נישט פארזיכערט", פארשפרייט זיך יעצט נאכאמאל אויפן אינטערנעט. אבער די קאמענטארן זענען נישט קיין נייע. פוטין האט דאס געזאגט דעם 28'סטן נאוועמבער 2024, ביי א פרעסע קאנפערענץ נאך א זיכערהייט סאמיט אין אסטאנא, קאזאכסטאן, עטליכע וואכן נאכדעם וואס טראמפ האט געוואונען די עלעקשאנס.


אין די קליפ הערט מען ווי פוטין רעדט ארום איבער די "דערנידעריגנדע" געריכט פראצעדורן און קלאגעס וואס טראמפ האט מיטגעמאכט, און אז זיין פאמיליע און קינדער זענען אויך געווארן אטאקירט. פוטין האט צוגעגעבן אז אפילו קרימינאלע באנדעס אין רוסלאנד רירן נישט צו קיין פרויען און קינדער, און דאס צייגט ווי נידריג די אמעריקאנער פאליטישע סיסטעם איז געפאלן. ער האט אויך אנגעוויזן אויף די פריערדיגע אטענטאט פרואוון אויף טראמפ'ס לעבן, אריינגערעכנט די שיסעריי ביי די ראלי אין פענסילוועניע אין יולי 2024.


די קאמענטארן זענען פארשטייט זיך פוטין'ס אייגענע בליק. בשעת טראמפ און זיינע שטיצער האבן אנגערופן די געריכט קעיסעס א פאליטישע רדיפה, האבן פראקורארן און די געריכטן געטענה'ט אז זיי זענען בלויז נאכגעגאנגען דאס געזעץ. די קליפ באקומט יעצט פרישע אויפמערקזאמקייט אין ליכט פון די אנגייענדע געשפרעכן איבער די אוקריינע מלחמה. ביי די היי-יעריגע 'וואלדאי פארום' האט פוטין געזאגט אז ער האט א גוטע און לאנג-יעריגע באציאונג מיט טראמפ, און ער גלייבט אז טראמפ פרובירט באמת צו לעזן די קריג.


די גרויסע פראגע וואס פילע פאליטישע אנאליסטן פרעגן יעצט איז, פארוואס די אלטע קליפ צירקולירט יעצט נאכאמאל, און צי פוטין'ס לויב ווערטער שפיגלען אפ אן אמת'ע רעספעקט צו טראמפ, אדער איז דאס אן אויסגערעכנטע מעסעדזש געשיקט קיין וואשינגטאן.