סופער-אינטעליגענץ אויפ'ן ראדאר פונעם פעד: ווארש ווארנט אז עי-איי קען אויך אנטוישן
פעדעראל רעזערוו טשערמאן: מיר גרייטן זיך שוין אויף די עפעקטן פון 'עי-איי' אויף די אמעריקאנער עקאנאמיע
דער פעדעראל רעזערוו טשערמאן, קעווין ווארש, זאגט אז דער צענטראלער באנק גרייט זיך שוין אויף דעם וואס 'עי-איי' (AI) קען טון צו די אמעריקאנער עקאנאמיע.
ביי א קאנפערענץ איבער פראדוקטיוויטעט און דזשאבס וואס איז פארגעקומען נאוועמבער 16 אין די סאן פראנציסקא פעד, האט ווארש געזאגט אז די פעד סטאף האט שוין אנגעהויבן צו שטודירן פארשידענע מעגליכקייטן און בויען סצענארן ווי אזוי זאכן קענען זיך אויסקאכן. איין סצענאר איז דער בעסטער פאל, וואו עי-איי - וואס ער רופט אן "סופער אינטעלידזשענס" - וועט הייבן די וואוקס און פראדוקטיוויטעט אין א ריזיגע בום, וואס וועט ברענגען רווחים סיי פאר די ארבעטסגעבער און סיי פאר די ארבעטער.
ווארש האט אונטערגעשטראכן אז די סצענארן זענען בלויז אילוסטראציעס און נישט קיין פאראויסזאגונגען. ער האט אויך קלארגעמאכט אז די ראלע פון די פעד איז נישט צו שטיצן אדער זיין קעגן עי-איי, נאר צו פארשטיין ווי אזוי דאס קען אפעקטירן די עקאנאמיע און מאנעטארי פאליסי אויב עס ווערט ברייט אנגענומען אין די מארקעט.
די אנדערע סצענארן זענען אבער ווייניגער באקוועם. לויט באריכטן פון זיין רעדע, רעכנט עס אריין א מעגליכקייט פון גרויסע דזשאב פארלוסטן, און א דריטע סצענאר וואו עי-איי וועט אנטוישן. אין אזא פאל, האט ווארש געזאגט, קענען די ריזיגע אינוועסטמענטס נישט דעליווערן די ערווארטעטע פראפיטן, די סטאק מארקעט קען פאלן, און די עקאנאמישע וואוקס קען זיך אפשטעלן בשעת די ארבעטסלאזיגקייט ראטע וועט שטייגן. כאטש די עקאנאמיע וועט זיך עווענטועל ערהוילן, וועט עס אבער זיין אן די ערווארטעטע פראדוקטיוויטעט רווחים.
די קאנפערענץ איז געווען די ערשטע פובליק אויפטרעטונג פון איינע פון די פינף 'טעסק פארס' גרופעס וואס ווארש האט אויפגעשטעלט זינט ער האט איבערגענומען דעם אפיס. ער האט אבער נישט קאמענטירט איבער די קורצ-טערמיניגע אינטערעסט ראטעס אדער די יעצטיגע עקאנאמישע צושטאנד.
די הויפט אפענע פראגעס בלייבן דערווייל: ווי גרויס וועלן די פראדוקטיוויטעט רווחים פון עי-איי באמת זיין, און ווען וועלן זיי זיך אנהויבן אנזען? אויף דעם האט נאך קיינער דערווייל נישט קיין קלארע ענטפער.