נאציאנאלע עמערדזשענסי אלערט: אמעריקע האקט איבער טעלעוויזיע און ראדיא סטאנציעס אין ערשטן נאציאנאלן טעסט זינט 2023
נאציאנאלע 'עמערדזשענסי אלערט סיסטעם' פראבירט געווארן איבער אמעריקע צום ערשטן מאל אין דריי יאר
טעלעוויזיע און ראדיא סטאנציעס איבער די פאראייניגטע שטאטן זענען קורצליך איבערגעריסן געווארן דעם נאוועמבער 17, ווען פעדעראלע אגענטורן האבן דורכגעפירט א נאציאנאלע פראבע אויף די 'עמערדזשענסי אלערט סיסטעם' צום ערשטן מאל אין דריי יאר.
ארום 2:20 נאכמיטאג (איסטערן צייט), האט די פעדעראלע עמערדזשענסי מענעדזשמענט אגענטור (FEMA), אין א קאאפעראציע מיט די פעדעראלע קאמיוניקאציע קאמיסיע (FCC), ארויסגעשיקט א פראבע מעסעדזש דורך ראדיא, טעלעוויזיע, קעיבל און סעטעלייט פראוויידערס איבערן לאנד. צוהערער האבן געהערט די באקאנטע עמערדזשענסי אלערט קלאנגען, באגלייט מיט א קלארע מעסעדזש אז דאס איז בלויז א טעסט און דער פובליק דארף גארנישט טון דערוועגן.
די ציל פון די פראבע איז צו זיכער מאכן אז די נאציאנאלע ווארענונג סיסטעם ארבעט געהעריג און קען פארלעסליך איבערגעבן וויכטיגע אינפארמאציע איבערן גאנצן לאנד אין פאל פון אן אמת'ע עמערדזשענסי. לויט'ן פעדעראלן געזעץ, מוז FEMA דורכפירן אזעלכע נאציאנאלע טעסטס אויף די פובליק אלערט סיסטעמען כאטש איין מאל אין דריי יאר, צו קענען כאפן און פאררעכטן סיי וועלכע טעכנישע פראבלעמען בעפאר אן עכטע קריזיס פאסירט.
די פריערדיגע נאציאנאלע פראבע איז פארגעקומען אום אקטאבער דעם 4'טן 2023, בלויז דריי טעג בעפאר די בלוטיגע שמחת תורה אטאקעס דורך כאמאס אויף ארץ ישראל. אנדערש ווי אין 2023, ווען די פראבע האט אויך אריינגענומען ווייערלעס אלערטס צו סעלפאונס, האט די יעצטיגע נאוועמבער 17 טעסט זיך בלויז קאנצענטרירט אויף די טעלעוויזיע און ראדיא סיסטעמען, און עס זענען נישט געשיקט געווארן קיין אלערטס צו סעלפאונס.
די סיסטעם איז ספעציעל אויסגעשטעלט צו געבן א מעגליכקייט פארן פרעזידענט אדער אנדערע הויכראנגיקע פעדעראלע באאמטע צו קאמיוניקירן קריטישע אינפארמאציע צו די מאסן דורכאויס א נאציאנאלע עמערדזשענסי אדער נאטורליכע קאטאסטראפע.
כאטש די פלוצלינגדיגע איבעררייס האט מעגליך איבערגעשראקן טייל מענטשן, האבן באאמטע קלארגעשטעלט אז דאס איז א רוטינע פראצעדור. FEMA האט באשטעטיגט אז די פראבע איז דורכגעפירט געווארן מיט סוקסעס, אונטערשטרייכנדיג די וויכטיגקייט פון האלטן די קאמיוניקאציע נעצן גרייט צו גרייכן מיליאנען אמעריקאנער אין פאל פון א נויט.