סעקרעטאר רוביא ווארפט אפ די טעאריע אז א סייבער אטאקע איז שולדיג אין די נאציאנאלע טעק קראכן: "נול באווייזן"
סעקרעטערי אוו סטעיט מארקא רוביא: "קיין שום באווייזן אז די לעצטיגע כוואליע פון טעכנישע פראבלעמען זענען פארבינדן איינס צום צווייטן"
אמעריקאנער סעקרעטערי אוו סטעיט מארקא רוביא זאגט אז עס זענען נישטא קיין שום באווייזן אז די לעצטיגע כוואליע פון טעכנישע פראבלעמען און סיסטעם דורכפאלן איבער'ן לאנד זענען פארבינדן איינס צום צווייטן.
רעדנדיג צו רעפארטער אין מאנילא, פיליפינען, האט רוביא קלארגעשטעלט אז עס איז נישטא קיין שום סיבה צו גלייבן אז די אינצידענטן האבן א שייכות, און גארנישט צייגט אז העקערס, פארברעכער, א פרעמדע לאנד, אדער אנדערע בייזוויליגע עלעמענטן זענען אונטער דעם. ער האט אראפגעלייגט יעדן אינצידענט אלס אן איזאלירטע פאל מיט איר אייגענע באזונדערע אורזאך. די קאמענטארן זענען געצילט צו בארואיגן דעם פובליק נאך א וואך פון כאאס וואס האט באטראפן בענק, לופט רייזעס, און רעגירונג סיסטעמען.
די דורכפאלן האבן אריינגערעכנט פראבלעמען ביי מייקראסאפט, טשעיס באנק (JPMorgan Chase), די עיר טראפיק קאנטראל, און די 'נאציאנאלע סעקיוריטי אגענטור' (NSA). דער פראבלעם ביי טשעיס האט פארשטייטערט אנליין בענקינג ביי עטליכע גרויסע בענק ווי אויך די 'זעל' (Zelle) געלט-טראנספער סערוויס. טשעיס האט אנגעלייגט די שולד אויף א 'סאפטווער באג' און האט קלארגעמאכט אז עס האט נישט קיין שייכות מיט א סייבער אטאקע.
יונייטעד עירליינס האט אויך באריכטעט אן אינערליכע סיסטעם פראבלעם וואס האט פארהאלטן פליגערס פון זיך הייבן. אלע פארמישטע קאמפאניס און אגענטורן האבן קאטעגאריש געלייקנט אז סייבער אטאקעס אדער אויסער-קאנטראלע AI (עי-איי) סיסטעמען זענען געשטאנען אונטער זייערע פראבלעמען.
אבער נישט יעדער איז איבערצייגט. קריטיקירער אויף די סאציאלע מידיא פרעגן פארוואס מען פארקויפט פאר'ן פובליק אז אלץ איז אין בעסטן ארדענונג בעת וויכטיגע הויפט סיסטעמען פאלן כסדר אדורך. דערווייל באדייט רוביא'ס סטעיטמענט אז עס זענען נישטא קיין אפיציעלע באווייזן פון א פארבינדונג, וואס דאס לאזט איבער די שווערע פראגע: פארוואס זענען אזוי פיל גרויסע סיסטעמען צוזאמגעפאלן אין די זעלבע וואך?