רעוואלוציאנערע טעכנאלאגיע: נייע דראונס קענען זיך אליינס טשארדזשן דירעקט פון הויכע-וואלטעדזש פאוער-ליינס


א נייע סארט דראון וואס קען לאנדן דירעקט אויף לעבעדיגע הויכע-וואלטעדזש פאוער-ליינס און זיך אליינס טשארדזשן ניצנדיג די מאגנעטישע פעלד ארום די ווייערס, קען אינגאנצן טוישן דעם וועג וויאזוי עלעקטריק נעצן ווערן אינספעקטירט און אויפגעהאלטן. די טעכנאלאגיע, וועלכע איז אנטוויקלט געווארן דורך א פירמע אין מינכן מיטן נאמען "נאמאדיק" (Nomadic), ערלויבט אז די דראונס זאלן קענען ארויסגעשיקט ווערן אין בלויז עטליכע מינוט, אן דעם וואס מען זאל דארפן אפשפארן די עלעקטריק.


איינמאל דער דראון באהעפט זיך צום ווייער, קען עס כסדר מאניטארן וויכטיגע דעטאלן ווי די טעמפעראטור, ווייברעישאן, און אנדערע צייכנס וואס קענען אנדייטן אויף מעגליכע פראבלעמען וואס האלטן אינמיטן זיך אנטוויקלען. די כסדר'דיגע אינספעקציע קען שטארק ארויסהעלפן די יוטיליטי קאמפאניס צו כאפן פראבלעמען פריער, בעסער פלאנירן מעינטענענס, און מאכן א בעסערע באניץ פון די עקזיסטירנדע עלעקטריק גריד. דער צוגאנג גיט אויך א מעגליכקייט צו אינספעקטירן וויכטיגע אינפראסטרוקטור אן דארפן איבערהאקן די עלעקטריק סערוויס פאר די קאסטומערס.


די פירמע "נאמאדיק" גיט איבער אז אירע דראונס האבן שוין אנגעזאמלט מער ווי 20,000 שעה פון אפערירן אויף לעבעדיגע פאוער-ליינס איבער דייטשלאנד, נארוועגיע און די פאראייניגטע שטאטן. לויט די קאמפאני, איז די טעכנאלאגיע שוין געטעסט געווארן אויף ווייערס וואס טראגן וואלטעדזשעס ביז 420 קילאוואלטס, וואס צייגט איר פולע מעגליכקייט צו ווערן געניצט אויף הויכע-וואלטעדזש אינפראסטרוקטור. די מעגליכקייט פונעם דראון צו ציען ענערגיע פונעם מאגנעטישן פעלד ארום דעם ווייער איז דער הויפט טייל פונעם סיסטעם, וואס שפארט איין די נויט צו כסדר טשארדזשן די באטעריעס אדער זיי טוישן מעניועלי.


די קאמפאני האט יעצט אויפגעטריבן 6 מיליאן דאלאר אין פרישע פאנדינג צו קענען פארברייטערן אירע אפעראציעס און ווייטער אנטוויקלען די טעכנאלאגיע. קוקנדיג פאראויס, פלאנירט "נאמאדיק" צו אהערשטעלן א נייע פיטשור אין יאר 2027, וואס וועט ערלויבן די דראונס זיך אליינס צו רוקן פון איין סעקשאן פאוער-ליין צום צווייטן דורך רימאוט קאנטראל, אן דעם וואס ארבייטער זאלן עס דארפן אראפנעמען און צוריק ארויפשטעלן מיט די הענט.