כינע: מענטשליכע ראבאטן ציען די אויפמערקזאמקייט ביי א מאסיווע אויסשטעלונג אין שענזשען
כינע אין די צוקונפט: שען-זשען נוצט די 'APEC' סאמיט צו פרעזענטירן כינע'ס מאכט אין די ראבאטיקס אינדוסטריע
די שטאט שען-זשען אין כינע האט פארוואנדלט די אינטערנאציאנאלע 'APEC' סאמיט אין א ריזיגע אויסשטעלונג פאר כינע'ס שנעל-וואקסנדע ראבאטיקס אינדוסטריע, ווען היומענאיד (מענטשליכע-פארעם) ראבאטן און סערוויס ראבאטן זענען ארויסגעשטעלט געווארן איבער אלע גרויסע פובליק פלעצער אין שטאט.
איינע פון די מערסט אינטערעסאנטע סצענעס איז געווען ווען די רויטע 'T800' ראבאט פון די 'EngineAI' פירמע האט אנגעפירט א סינכראניזירטע טאנץ פאָרשטעלונג אינאיינעם מיט נאך צענדליגע ראבאטן ביים 'קאקא פארק' (COCO Park). דער T800 איז געשטאנען אינמיטן פונעם ספעקטאקל בשעת ארום 100 ראבאטן האבן געמאכט פונקטליכע באוועגונגען אינאיינעם אין א פובליק פלאזא, וואס האט געצויגן די אויפמערקזאמקייט פון פילע באזוכער און צוקוקער.
אבער ס'איז ווייט נישט נאר פאר אינטערטעינמענט. שען-זשען ווייזט דארט פראקטיש וויאזוי ראבאטן קענען איבערנעמען טעגליכע ארבעט אין פארנומענע פובליק פלעצער. ביים APEC מידיא צענטער, אינעם עירפארט און אין לאקאלע פארקן, קען מען זען ווי סערוויס ראבאטן העלפן ארויס מיט סערווירן קאווע, רייניגן, שלעפן פעקלעך און באדינען באזוכער.
די אלע דעמאנסטראציעס זענען א טייל פון א ברייטערע קאמפיין צו ווייזן פאר די אינטערנאציאנאלע פירער און באזוכער ביים סאמיט די גרויסע פארשריט וואס כינע האט געמאכט אין ראבאטיקס, אטאמאציע און ארטיפישעל אינטעלידזשענס (AI). אנשטאט צו האלטן די ראבאטן פארשפארט אין לאבאראטאריעס אדער ביי טעכנאלאגיע עקסהיבישענס, האט שען-זשען זיי ארויסגעשטעלט דירעקט אין די גאסן און טעגליכע פלעצער וואו יעדער קען זען זייער נוצליכקייט.
די טאנץ פאָרשטעלונג פונעם T800 איז א קלארע ביישפיל פון פונקטליכע ראבאטישע באוועגונגען, בשעת די סערוויס מאשינען ווייזן די פאטענציאל פאר האספיטאליטי, טראנספארטאציע און פובליק מעינטענענס. דאס גיט א בליק וויאזוי שטעט וועלן אין די צוקונפט מער און מער אריינברענגען אטאמאטישע סיסטעמען אין זייער טעגליכע אפעראציעס. אין א צייט וואס ראבאטיקס ווערט א הויפט פאקוס אין די גלאבאלע טעכנאלאגיע פארמעסט, שיקט שען-זשען א קלארע מעסעדזש איבער כינע'ס אמביציעס צו נעמען די ראבאטן פון בלויזע דעמאנסטראציעס און זיי אריינברענגען אין פראקטישן באנוץ.