מאסיווע פייער ברעכט אויס אין באכריין נאך איראנער אטאקע; קאנפליקטירנדע באריכטן איבער די אורזאך


א מאסיווע פייער האט אויסגעבראכן ביי אן אינדוסטריאלע צענטער אין די 'סיטרא' אינדוסטריאלע געגנט אין באכריין, נאך אן אטאקע וואס די באכריינער אויטאריטעטן האבן אנגעלייגט אויף איראן. ווידעא קליפס פון ביינאכט צייגן ריזיגע פלאמען און א געדיכטע רויך וואס הייבט זיך פונעם ארט.


די באכריינער אינערן מיניסטעריום האט געמאלדן אז א ציווילע אינדוסטריאלע געביידע איז געצילט געווארן דורכאויס די לעצטיגע איראנער לופט אטאקעס. עמערדזשענסי און פייער דעפארטמענט קרעפטן האבן זיך געאיילט צום סצענע צו קאנטראלירן דעם פייער און פארמיידן אז עס זאל זיך פארשפרייטן צו ארומיגע אינפראסטרוקטור. לויט די ערשטע באריכטן איז דא שווערע מאטעריאלע שאדנס, אבער ברוך השם קיין פארוואונדעטע.


דער אינצידענט קומט אין די זעלבע צייט וואס די באכריינער לופט פארטיידיגונס סיסטעמען האבן אינטערסעפטירט עטליכע איראנער אטאקעס, וואס האט געפירט די אויטאריטעטן ארויסצוגעבן זיכערהייט ווארענונגען און געהייסן די איינוואוינער זוכן שוץ. די איראנער רעוואלוציאנערע גווארדיע (IRGC) האט גענומען פאראנטווארטליכקייט אויף די מיסיל און דראון אפעראציע, זאגנדיג אז זיי האבן געצילט אמעריקאנער מיליטערישע באזעס אין 'על-ריפא' און 'אוואלי', טענה'נדיג אז אמעריקאנער קרעפטן האבן פארלעצט דעם איראנער לופט-רוים. זיי האבן אויך געמאלדן אז זיי האבן פארניכטעט אמעריקאנער 'פאטריאט' ראדאר סיסטעמען אין באכריין, כאטש דאס איז נישט באשטעטיגט געווארן דורך קיין אומאפהענגיגע קוועלעס.


פון די אנדערע זייט, האבן איראנער סטעיט מידיא אגענטורן ארויסגעשטעלט א קאנפליקטירנדע ווערסיע איבער דעם פייער. לויט זייער באריכט, איז אן אמעריקאנער אינטערסעפטאר מיסיל - וואס איז ארויסגעשאסן געווארן פון די אמעריקאנער פינפטע פלאטע באזע אין באכריין - געפאלן אויפן סיטרא אינזל און פאראורזאכט דעם מאסיוון פייער. זיי טענה'ן אז א טעכנישע דורכפאל אינעם 'פאטריאט' לופט פארטיידיגונס סיסטעם האט געפירט צום עקסידענט.


די באכריינער רעגירונג, אבער, האלט זיך ביי דאס אירע און באשולדיגט דירעקט די איראנער אגרעסיע, אן ארויסגעבן פונקטליכע דעטאלן וועלכע וואפן עס איז גענוצט געווארן. די קעגנזייטיגע באשולדיגונגען לייגן צו צום אומקלארקייט פונעם אינצידענט בעת די מיליטערישע אנגעצויגנקייט אין די ראיאן האלט אין איין שטייגן. דערווייל זענען די לאקאלע אויטאריטעטן פאקוסירט אויף דאס פארלעשן דעם פייער, אפשאצן די שאדנס, און אנהאלטן די זיכערהייט אינעם פערסישן גאלף ראיאן.