בס"ד

כאאס אין תימן: חותי רעבעלן לייגן ארויס ווידעא פון ריזיגן געכאפטן וואפן-לאגער נאך וואס רעגירונג קרעפטן האבן זיך צוריקגעצויגן

די איראן-געשטיצטע חותי רעבעלן אין תימן האבן פארעפנטליכט פרישע רעקארדירונגען וואס צייגט לויט זיי א ריזיגע קוואנטום פון מיליטערישע געווער און עקוויפמענט וואס איז אריינגעפאלן אין זייערע הענט. דאס קומט נאכדעם וואס די קרעפטן פון די אינטערנאציאנאל-אנערקענטע תימן'ער רעגירונג האבן זיך צוריקגעצויגן פון זייערע פאזיציעס ביים מערב בארטן פונעם לאנד.


די ווידעא צייגט א ברייטע קאלעקציע פון וואפן, אריינגערעכנט דראונס, אטאקע-ביקסן, מארטארס, אנטי-טאנק געווער, ראקעטן און מיליטערישע טרעקלעך. א טייל פון די עקוויפמענט זעט אויס צו זיין אינגאנצן ניי אדער נאך אין די ארגינעלע פעקלעך, וואס ברענגט ארויף פראגעס איבער וויפיל מיליטערישע געצייג די רעגירונג קרעפטן האבן איבערגעלאזט אונטער זיך ביי זייער אומגעראכטענעם ריקצוג.


די אנטוויקלונג קומט אינמיטן גרויסע טוישונגען אויפ'ן שלאכטפעלד, וואו די סאודי-געשטיצטע תימן'ער קרעפטן האבן זיך ארויסגעצויגן פון די סטראטעגיש-וויכטיגע 'באב על מאנדעב' דורכגאס, וואס האט ערמעגליכט פאר די חותי קעמפער פאראויסצוגיין און איבערנעמען די פאזיציעס. די חותים בארימען זיך אז די געכאפטע וואפן איז א מעכטיגע צוגאב צו זייער מיליטערישע ארסענאל, ספעציעל יעצט ווען זיי פארברייטערן זייער קאנטראל ביים ים סוף בארטן.


די באריכטן איבער די געכאפטע וואפן ברענגט ארויס די גרויסע סכנה וואס לויערט אויף די אפיציעלע תימן'ער רעגירונג, וועלכע פלאגט זיך אנצוהאלטן קאנטראל אויף סטראטעגישע שטחים קעגן די איראן-געשטיצטע רעבעלן. די נייעס אגענטור 'רויטערס' האט אויך באריכטעט איבער די געכאפטע עקוויפמענט, וואס נעמט אריין געפאנצערטע קאמפס-טרעקלעך, א טאנק, ארטילעריע און עלעקטראנישע מלחמה-געצייג. דער וואקסנדער ארסענאל פון די חותים איז פארוואנדלט געווארן אין א ערנסטע רעגיאנאלע זיכערהייט-זארג, וויבאלד זיי פארמאגן דראונס און מיסילס וואס קענען סטראשען מיליטערישע באזעס, קאמערציאלע שיפן און ארומיגע לענדער.


פונדעסטוועגן, ווארענען עקספערטן אז מען דארף נעמען די חותי רעקארדירונגען מיט א מאס פאָרזיכטיגקייט, וויבאלד די טעראר גרופע האט א קלארע אינטערעסע צו איבערטרייבן זייערע זיגן אויפ'ן פראנט פאר פראפאגאנדע צוועקן. עס וועט זיך פאדערן אן אומאפהענגיגע אויספארשונג צו באשטעטיגן צי אלע וואפן אין די ווידעא זענען טאקע יעצט געכאפט געווארן, צי זיי זענען טאקע איבערגעלאזט געווארן ביים ריקצוג, און וויפיל פון די געצייג קען נאך פאקטיש גענוצט ווערן אין קאמף.