ווידיאו: ווילדע מאטארציקל שטיק אויף א ביזי הייוועי אין איידעהא ענדיגט זיך מיט א שרעקליכן קראך


א פרואוו צו מאכן א ווילדע שטיק מיט א מאטארציקל אויף איינע פון די פארנומענסטע הייוועיס אין איידעהא האט זיך געענדיגט מיט א דראמאטישן פאל, ווען דער דרייווער האט פארלוירן קאנטראל און אראפגעפלויגן אינמיטן די פליסנדע טרעפיק.


דער אינצידענט האט פאסירט סעפטעמבער 9 אויף די 'אינטערסטעיט 84' הייוועי אין די שטאט באיסי. ארומיגע דרייווערס האבן אפגעכאפט דעם גאנצן מאמענט אויף קאמערע, ווי מען זעט ווי דער מאטארציקל פליער הייבט אויף זיין פאדערשטע רעדל (אזוי גערופן א 'ווילי'), אבער ער בייגט זיך צופיל אויף צוריק, פליט אראפ פונעם בייק, און קוילערט זיך איבערן ראוד בעת אנדערע קארס פרובירן זיך ארויסצודרייען פון אים. לויט באריכטן האבן דער דרייווער און נאך א מאטארציקל פליער זיך ארומגעדרייט ווילד צווישן די קארס, און ביידע האבן זיך געטוישט מאכן שטיקעס אינמיטן די הייוועי. בחסדי השם האט זיך עס געענדיגט אן קיין ערנסטע פארוואונדעטע, און די איידעהא סטעיט פאליציי האט באשטעטיגט אז מעדיצינישע פערסאנאל זענען אנגעקומען אויפן סצענע און אים באהאנדלט אויפן ארט אן דארפן פירן אין שפיטאל.


טראץ וואס דער מאטארציקל דרייווער איז ארויס אומגעשעדיגט, האבן די פאליציי קלארגעשטעלט אז עס וועלן זיין קאנסעקווענצן פאר די ווילדע אויפפירונג. די סטעיט פאליציי האט געגעבן טיקעטס פאר ביידע מאטארציקל דרייווערס פאר 'רעקלעס דרייווינג' (ווילדע דרייווינג), און זיי באהאנדלען דעם אינצידענט ווי אן ערנסטע פארברעך און נישט סתם א נארישע שפיל. באאמטע האבן ארויסגעברענגט אז די סכנה איז פיל גרעסער ווי בלויז פאר די צוויי דרייווערס אליין, וויבאלד אזעלכע שטיקעס אינמיטן א ביזי ראוד קען צווינגען אנדערע דרייווערס צו ברעיקן פלוצלינג, זיך ארויסדרייען אומגעראכטן, אדער פארלירן קאנטראל, וואס קען פירן צו א קייט-רעאקציע און א מאסיווע קראך מיט מענטשן וואס האבן גארנישט געהאט מיט די גאנצע מעשה.


די איידעהא סטעיט פאטראל האט שפעטער ארויסגעשטעלט דעם ווידיאו פונעם קראך אויף אינסטעגראם, ניצנדיג דאס אלס א לעבעדיגע ביישפיל פארוואס ווילדע דרייווינג אויף הייוועיס איז אזא ערנסטע סכנה. אינאיינעם מיטן ווידיאו האט די אגענטור איבערגעגעבן א דירעקטע מעסעדזש צו מאטארציקל דרייווערס יעצט ווען די זומער סעזאן קומט צו אן ענדע. "האט הנאה פון די איבערגעבליבענע גוטע וועטערס, אבער פארט מיט פאראנטווארטליכקייט," האט די דעפארטמענט געשריבן, צולייגנדיג א שארפע ווארענונג אז "רעקלעס דרייווינג שטעלט יעדן איינעם אויפן ראוד אין א סכנה."


דער אינצידענט דינט ווי א שטארקע דערמאנונג אז מאכן שטיקעס אויף פובליק ראודס קומט מיט ערנסטע קאנסעקווענצן. וואס האט זיך אנגעהויבן ווי א פרואוו זיך צו גרויסן פאר אנדערע דרייווערס, האט זיך אויסגעלאזט ווי א שרעקעדיגע לעקציע וואס פארשפרייט זיך יעצט אויפן אינטערנעט, און ברענגט ארויס פונקטליך דעם מעסעדזש וואס די פאליציי וויל שיקן פארן פובליק.