היסטארישע דערגרייכונג פאר 'ספעיס-עקס': נייע בילדער צייגן דעם ריזיגן 'סטארשיפ' ראקעט נאכן סוקסעספולן לאנדונג אינעם אינדישן אקעאן

נייע בילדער און ווידעאוס זענען ארויסגעשטעלט געווארן פון די 'ספעיס-עקס' (SpaceX) שיף 40, דער אויבערשטער טייל פונעם ראקעט פון די 'סטארשיפ פלייט 13' מיסיע, וואס צייגט ווי אומגעהויער ריזיג דער פלי-געצייג איז באמת. אויף די בילדער קען מען זען ווי די ספעיס-עקס ארבעטער קוקן אויס ווי קליינע מוראשקעס קעגן דעם 52-מעטער הויכן מעטאלענעם ריז בעת עס האט געשווימען אינעם אינדישן אקעאן.

דער ראקעט האט געמאכט א סוקסעספולע "ספלעשדאון" (לאנדונג אין וואסער) דעם 24'סטן יולי, 2026, נאך א קאנטראלירטע צוריקקער צום אטמאספער. ספעיס-עקס זאגט אז דאס איז געווען די סאמע מילדסטע וואסער-לאנדונג וואס די 'סטארשיפ' פראגראם האט נאר אמאל באוויזן. אלע זעקס ענדזשינס האבן ווייטער פונקציאנירט, און די שיף איז געבליבן גענוג לופט-דיכט אז עס זאל קענען שווימען אויפ'ן וואסער אן זיך צעברעכן אדער זינקען - א רעזולטאט וואס די קאמפאני האט ארגינעל בכלל נישט ערווארטעט.

די רעקאווערי מאנשאפטן האבן פארברענגט 24 טעג זיך שלאגנדיג מיט ווילדע כוואליעס אינעם אינדישן אקעאן, ביז זיי האבן ענדליך באוויזן צו פירן דעם מאסיוון ספעיס-קראפט צו רואיגערע וואסערן נעבן 'קריסטמעס איילענד', וואו מען האט עס געקענט געהעריג אונטערזוכן פון דער נאענט און עווענטועל אפשלעפן צום ברעג.

דאס אז דער ראקעט איז געבליבן אינגאנצן גאנץ, גיט פאר ספעיס-עקס אן אומגעהויערע מעגליכקייט וואס זיי האבן נאכקיינמאל פריער נישט געהאט: די טשענס צו דירעקט אונטערזוכן די 'היט שילד' טיילס און ענדזשינס פונעם ראקעט באלד נאכ'ן אדורכגיין די עקסטרעמע היץ און פרעשור פונעם צוריקקער, אנשטאט זיך נאר צו פארלאזן אויף סענסאר דאטא. אינזשענירן האבן אויסגענוצט דעם נאענטן צוטריט צו שטודירן ווי גוט די טיילס האבן זיך געהאלטן און די שאדנס וואס עס האט געליטן, וואס דאס וועט דירעקט אריינגיין אינעם פלאן ביים דיזיינען די קומענדיגע שיפן.

דער מיילשטיין איז אן אמת'ע פארשריט צו דעם וואס ספעיס-עקס רופט שוין לאנג די "הייליגע גראַל" פון ספעיס רייזעס - א צוקונפט וואו סיי דער בוסטער און סיי דער אויבערשטער טייל פונעם ראקעט קומען צוריק גאנץ און קענען ווערן איבערגענוצט גאר שנעל. דאס איז א שארפער קאנטראסט צו די צענדליגע יארן פון ספעיס רייזעס, וואו ראקעטן זענען געבויט געווארן איין מאל, געפלויגן איין מאל, און דערנאך ארויסגעווארפן געווארן.

מיט די סוקסעספולע כאפן פונעם בוסטער, קאנטראלירטע וואסער-לאנדונגען, און יעצט די פולע אקעאן-רעקאווערי וואס זענען אלע דעמאנסטרירט געווארן איינס נאכ'ן צווייטן, קוקט אויס אז ספעיס-עקס'ס חלום פון א פולשטענדיג איבערנוצבארע 'סטארשיפ' סיסטעם איז שוין מער נישט קיין ווייטע ציל, נאר א פלאן וואס ווערט שוין פאקטיש צוזאמגעשטעלט שטיקל ביי שטיקל.