וויליאמסבורג. – כ"ק אדמו"ר מסאטמאר שליט"א , הייבט אן זיין טאג גאר פרי. יעדן אינדערפרי ארום פיר אזייגער פארטאגס קומט דער רבי אן אין ביהמ"ד הגדול דקהל יטב לב ד'סאטמאר אויף ראדני סטריט צו לערנען תורה, נאך בעפאר די גאנצע שטאט ערוועקט זיך צום נייעם טאג.


 

דער ראדני ביהמ"ד איז דער היסטארישער צענטער פון די סאטמארער קהילה, וועלכע איז געגרינדעט געווארן דורך דעם מייסד הקהילה, הרה"ק מרן רבי יואל זי"ע, נאכדעם וואס ער האט איבערגעבויט סאטמאר אין וויליאמסבורג נאכן צווייטן וועלט קריג מיט א קליינע צאל פון ארום זיבעציג חסידים. די קהילה האט זיך צעוואקסן אין די קומענדיגע יארצענדלינגען אין אומגלויבליכע פראפארציעס, און ביז די אכציגער יארן האט די קהילה שוין געציילט איבער 10,000 רעגיסטרירטע מעמבערס.


 

דער סאטמארער רבי שליט"א האט איבערגענומען די הנהגה אין וויליאמסבורג נאך די פטירה פון זיין טאטן, הרה"ק בעל 'ברך משה' זי"ע, אין יאר תשס"ו, נאך יארן פון שפאנונג איבער די הנהגה מיט זיין עלטערן ברודער, כ"ק אדמו"ר מסאטמאר שליט"א (מהר"א), וועלכער פירט די קהילה אין קרית יואל. אין די גאס ווערן די חסידים פונעם רבין אין וויליאמסבורג אפט אנגערופן "זאליס".


 

דער רבי איז באקאנט מיט זיינע קלארע און שארפע פובליק שטעלונגען. צווישן אנדערע האט ער לעצטנס שארף פארדאמט די געמיינזאמע פראטעסטן פון נטורי קרתא אינאיינעם מיט כאמאס שטיצער דורכאויס די יעצטיגע מלחמה, וואס ער האט אנגערופן אלס א געפערליכער חילול השם.


 

די פארטאגס שעות וואס דער רבי פארברענגט אינעם ראדני ביהמ"ד שפיגלט אפ א ברייטערע ציל פונעם רבין צוריקצושטעלן דעם צורה און אטמאספערע וואס האט געהערשט אין די קהילה אונטערן גרינדער פונעם חסידות.