בס"ד

טראגעדיע אין ארץ ישראל: 9-יעריגער אינגל נפטר געווארן נאכן אנגעשטעקט ווערן מיט זעלטענע באצילן ביים שווימען אינעם כנרת

א שרעקליכע טראגעדיע האט פאסירט ווען א 9-יעריגער אינגל איז ליידער נפטר געווארן נאכן אנגעשטעקט ווערן מיט א גאר זעלטענע און געפארפולע באציל (אמיבא) נאכן שווימען אינעם כנרת. אזוי האט די ארטיגע העלט מיניסטעריום געמאלדן דעם דאנערשטאג.

דאס קינד, ברוך נריה ע"ה פון פרדס חנה, איז אריינגעפירט געווארן אין שפיטאל אינעם רמב"ם מעדיקעל צענטער אין חיפה אין א קריטישן צושטאנד מיט א שווערע אינפעקציע אין מח. דאקטוירים אינעם קינדער אינטענסיוו קעיר אפטיילונג (ICU) האבן אים איינגעשלאפן און ארויפגעלייגט אויף א רעספירעיטאר בעת זיי האבן געקעמפט פאר זיין לעבן, אבער ליידער האבן זיי נישט געקענט ראטעווען זיין לעבן און ער איז אומגעקומען פונעם שרעקליכן אינפעקציע.

טעסטס וואס זענען דורכגעפירט געווארן דורך די לאבאראטאריעס פונעם העלט מיניסטעריום האבן באשטעטיגט אז דאס קינד איז אנגעשטעקט געווארן מיט די זעלטענע 'נעגלעריע פאולערי' (Naegleria fowleri) אמיבא. אן אויספארשונג האט געוויזן אז ער האט געשווימען ביים 'כורסי' ביטש ביים כנרת ארום א וואך בעפאר ער איז אריינגעפירט געווארן אין שפיטאל.

די דאזיגע באציל געפינט זיך געווענליך אין ווארעמע פרישע וואסערן, און אין גאר זעלטענע פעלער קען עס פאראורזאכן א שווערע אינפעקציע אינעם צענטראלן נערוון סיסטעם. מען קען זיך אנשטעקן דערמיט ווען די אומזויבערע וואסער גייט אריין דורך די נאז און די באצילן דערגרייכן דעם מח.

געזונטהייט באאמטע האבן קלארגעשטעלט אז מען קען זיך נישט אנשטעקן דערמיט דורך טרינקען די וואסער, און עס איז נישט קיין קלעבעדיגע קרענק וואס גייט אריבער פון איין מענטש צום צווייטן. איבער די גאנצע וועלט זענען באריכטעט געווארן ווייניגער ווי 500 אזעלכע פעלער אין די היסטאריע.

נאך דעם טראגישן פאל, האט די העלט מיניסטעריום ארויסגעגעבן א ווארענונג פאר די וואס שווימען אינעם כנרת, אז מען זאל אכטונג געבן אז קיין וואסער זאל נישט אריינגיין אין די נאז, ספעציעל ווען מען טונקט דעם קאפ אונטערן וואסער אדער מען שפרינגט אריין דערין. דערווייל האבן די באאמטע נישט פארארדנט צו פארמאכן די ביטשעס ביים כנרת.

די העלט מיניסטעריום האט אויסגעדרוקט אירע טיפע טרייסט וואונטשן פאר די צובראכענע פאמיליע.