צענדליגע חרדי'שע פראטעסטירער בלאקירן 'הייוועי 4' אין ארץ ישראל נאך ארעסט פון צוויי ישיבה בחורים


צענדליגע חרדי'שע אידן האבן זונטאג אינדערפרי, דעם 18'טן אקטאבער, בלאקירט די וויכטיגע 'הייוועי 4' שאסיי נעבן דעם גן יבנה אינטערטשעינדזש, אין א שטורמישע פראטעסט קעגן דעם ארעסט און טורמע אורטייל פון צוויי ישיבה בחורים איבער די גיוס פראבלעמען.


די פראטעסט, וואס איז ארגאניזירט געווארן דורך אקטיוויסטן אונטער די פירערשאפט פון הגאון ר' צבי פרידמאן שליט"א, האט זיך אנגעהויבן פונקט אין די פארנומענע אינדערפרי שטונדן (ראש אוער), וואס האט געפירט צו שווערע טראפיק און כאאס נאכדעם וואס די פראטעסטירער זענען אראפגעגאנגען אויפ'ן שאסיי און גענצליך אפגעשטעלט די קארס פון קענען פארבייפארן.


די אומרוען קומען נאכדעם וואס עס איז ארויסגעגעבן געווארן אן אורטייל פון 20 טעג אין א מיליטערישע טורמע פאר די צוויי בחורים, הבחור ידידיה מזרחי, א תלמיד פון ישיבת אור החיים, און הבחור יונתן מוסטקיס, וועלכע זענען ביידע ארעסטירט געווארן אין שטאט ראשון לציון.


לויט ווי די עסקנים געבן איבער, זענען די צוויי בחורים פארהאלטן געווארן נאכדעם וואס מ'האט זיי צוריקגעהאלטן פון זיך פארבינדן מיט די באקאנטע 'צבע שחור' האטליין, וואס דינט צו אלארמירן די אקטיוויסטן ווען די מיליטערישע פאליציי קומט דורכצופירן גיוס ארעסטן.


לויט די ארגינעלע פלענער האט די פראטעסט געזאלט פארקומען שפעטער נאכמיטאג אין די גוש דן געגנט, אבער עס איז אין די לעצטע מינוט אריבערגערוקט געווארן אויף אינדערפרי אן קיין פריערדיגע מעלדונג, צו איבערראשן די אינסטאנצן.


גרויסע כוחות פון די פאליציי זענען אראפגעקומען אויפ'ן סצענע און אנגעהויבן אוועקשלעפן די פראטעסטירער פונעם הייוועי. עס זענען באריכטעט געווארן קאנפראנטאציעס צווישן די פאליציי און די מאסן בעת די אפיצירן האבן פרובירט צוריקצושטעלן דעם טראפיק, ווען די פראטעסטירער האבן זיך קעגנגעשטעלט די פרואוון זיי צו באזייטיגן פונעם שאסיי.


נאך ארום אנדערהאלבן שעה איז די פאליציי ענדליך געלונגען צו אויסרייניגן די לעינס און די טראפיק האט אנגעהויבן פארן נארמאל.


די פראטעסט קומט אין א צייט וואס די אנגעצויגנקייט אין די חרדי'שע גאס האלט אין איין שטייגן איבער די גיוס גזירה און די כסדר'דיגע ארעסטן פון ישיבה בחורים דורך די מיליטערישע אינסטאנצן.