בס"ד

הגאון המגיד ר' ברוך ראזענבלום קריטיקירט שארף דעם פראבלעם פון בחורים וואס ווארפן אפ שידוכים באזירט אויף בילדער


דער באקאנטער מגיד מישרים הגאון ר' ברוך ראזענבלום האט ארויסגעטרעטן מיט א שארפע קריטיק קעגן דעם וואקסנדן פראבלעם וואס ישיבה בחורים ווארפן אפ פאטענציעלע שידוכים בלויז באזירט אויף בילדער, ווארנענדיג אז דאס ברענגט אן א שווערן חורבן פאר די גאנצע פרשה פון שידוכים.


אין א פייערדיגע דרשה האט ר' ברוך אויסגעדרוקט זיין ווייטאג און פראסטראציע איבער דעם נייעם סטאנדארט וואס מ'ערווארט אז מ'זאל קודם שיקן א בילד פון די מיידל אויף 'וואטסעפ' בעפאר דער בחור וועט בכלל נעמען אין באטראכט זיך צו טרעפן מיט איר.


דער מגיד האט געפאדערט פון די יונגע בחורים אויפצוהערן מאכן באשלוסן בלויז לויט די אויסזען, און האט געווארנט אז די דאזיגע פירעכץ קען צוריקהאלטן גאר געלונגענע און פאסיגע שידוכים פון בכלל ווערן אנגעטראגן אדער באטראכט.


א קורצע ווידעא קליפ פון זיינע ווערטער איז ברייט צעשיקט געווארן אויף די סאציאלע נעצן, וואס האט געצויגן גרויס אויפמערקזאמקייט צו זיין וויכטיגע מעסידזש אז מ'דארף באהאנדלען שידוכים מיט פיל מער ערנסטקייט און רעספעקט.