פרעזידענט טראמפ פארטיידיגט דעם באשלוס צו 'לייוו-סטרימען' די עקזעקיושן פונעם 'פארט הוד' טעראריסט

פרעזידענט טראמפ האט זיך אנגענומען פאר דעם באשלוס צו טראנסמיטירן 'לייוו' די עקזעקיושן פון נידאל כאסאן, דער געוועזענער ארמיי מעידזשאר וועלכער איז פאראורטיילט געווארן פאר די שוידערליכע 'פארט הוד' שיסעריי אין יאר 2009. טראמפ האט געזאגט אז כאטש ער איז נישט געווען פערזענליך פארמישט אין דעם באשלוס עס צו מאכן פובליק, פארשטייט ער אבער די סיבה דערונטער, אנגעבנדיג אז באאמטע ווילן אז דאס זאל דינען ווי א שטרענגע ווארענונג פאר אנדערע.

דער פרעזידענט האט אראפגעלייגט די שרעקליכע ברוטאליטעט פון כאסאן'ס אטאקע מיט שארפע ווערטער, דערמאנענדיג ווי דער מערדער איז אריינגעקומען אין א צימער און אנגעהויבן שיסן אויף אלע זייטן אן קיין רחמנות, אומברענגענדיג 14 מענטשן און פארוואונדענדיג נאך 22, אינדערצייט וואס ער האט געשריגן ווילדע קולות בעת'ן דורכפירן די אטאקע. לויט טראמפ, איז דער באשלוס צו בראדקעסטן די עקזעקיושן א קלארע מעסעדזש איבער די קאנסעקווענצן פון אזעלכע געוואלדטאטן.

די עקזעקיושן, וואס איז באשטימט געווארן אויף דעצעמבער 3 אין די 'פארט הוד' באזע, וועט זיין די ערשטע מיליטערישע עקזעקיושן אין 65 יאר, און דאס ערשטע מאל וואס די ארמיי פירט דורך א טויט-שטראף אויף א זעלנער זינט דעם צווייטן וועלט קריג. פארטיידיגונגס סעקרעטאר פיט העגסעט האט באשטעטיגט אז די עקזעקיושן וועט דורכגעפירט ווערן דורך א 'פייערינג סקוואד' און וועט זיין פובליק און געוויזן ווערן לייוו. העגסעט האט זיך אויסגעדרוקט זייער שארף, זאגנדיג אז כאסאן'ס לעצטע פארלאנגען זענען אינגאנצן נישט אינטערעסאנט, און אז די וועלט וועט פשוט זען דעם רעזולטאט אינעם באשטימטן טאג.

כאסאן איז פאראורטיילט געווארן פאר מארד איבער די 2009 בלוטבאד אין די טעקסאס מיליטערישע באזע, וואו ער האט געעפנט פייער אויף זיינע אייגענע מיט-זעלנער, וואס לויט אים איז דאס געווען א פרואוו אפצושטעלן דאס שיקן טרופן קיין אפגאניסטאן. דער היסטארישער באשלוס צו מאכן די עקזעקיושן פובליק און עס טראנסמיטירן לייוו איז א דראסטישע טויש פון וויאזוי מיליטערישע טויט-שטראפן זענען טראדיציאנאל באהאנדלט געווארן, און עס ציט שוין יעצט א ריזיגע אינטערעסע איבער'ן גאנצן לאנד בעפאר דעם טאג פונעם אורטייל.