פרעזידענט טראמפ פארטיידיגט זיין נייעם 'דיזעל דיעל' מיט רוסלאנד; ווארנט זעלענסקי אפצושטעלן אטאקעס אויף אויל רעפיינעריס

פרעזידענט טראמפ האט שארף צוריקגעשאסן קעגן קריטיקירער וועלכע זאגן אז זיין נייע 'דיזעל דיעל' מיט רוסלאנד קען שלעפן די קריג אין אוקריינע, און האט אנשטאט ארויפגעלייגט די גאנצע שולד אויף דעם אוקריינישן פרעזידענט וולאדימיר זעלענסקי. ווען א רעפארטער האט אים געפרעגט איבער די קאנטראווערסיע, האט טראמפ זיך געהאלטן ביי זיינס אז זעלענסקי האט געהאט אסאך געלעגנהייטן צו ענדיגן די מלחמה און האט פשוט באשלאסן עס נישט צו טון.

דער פרעזידענט האט טענה'ט אז אוקריינע האט באקומען א פרייע האנט צו אטאקירן רוסלאנד ווי אזוי זיי ווילן, מיט איין אויסנאם: אויל רעפיינעריס. טראמפ זאגט אז די אטאקעס אויף די רעפיינעריס זענען די עכטע פראבלעם, וויבאלד עס טרייבט ארויף די פרייזן פון ברענשטאף פאר די גאנצע וועלט, אריינגערעכנט פאר אמעריקאנער פארמערס וועלכע זענען אנגעוויזן אויף ביליגע דיזעל.

די קאמענטארן קומען נאכדעם וואס טראמפ האט אויסגעארבעט אן אפמאך מיט וולאדימיר פוטין צו באקומען הונדערטער טויזנטער טאנען פון רוסישע דיזעל, אין אויסטויש פון צייטווייליג פארלייכטערן די סאנקציעס. דער דיעל איז דירעקט געבינדן צו דעם אז אוקריינע מוז אפשטעלן אירע אטאקעס אויף די רוסישע רעפיינעריס. זעלענסקי פון זיין זייט האט שארף קריטיקירט דעם אפמאך, אנרופנדיג עס א מתנה פאר פוטין וואס שלעפט נאר אויס די קריג אנשטאט עס צו ענדיגן.

טראמפ, פון זיין זייט, שטעלט אראפ דעם דיעל אלס א וויכטיגע שריט צו באשיצן אמעריקאנער קאנסומערס און פארמערס פון די הויכע דיזעל פרייזן, אפילו בשעת קריטיקירער טענה'ן אז עס באלוינט מאסקווע אויפן חשבון פון אוקריינע. מיט די אנגעצויגנקייט ארום דעם געפעכט, האט טראמפ קלארגעמאכט אז ער ערווארט אז זעלענסקי זאל זיך צושטעלן, און האט אים שארף געווארנט אז ער "זאל בעסער זען עס תיכף אפצושטעלן."