אוקראינע פלאנט צו פארניכטן אלע רוסישע אויל רעפיינעריס; זאגט זיך אפ פון נאכגעבן פרעזידענט טראמפ'ס פאדערונגען

אוקראינע האט ארויסגעגעבן איר מערסט-דרייסטע סטעיטמענט ביז איצט איבער איר קאמפיין קעגן רוסישע אויל רעפיינעריס, שווערנדיג אינגאנצן צו חרוב מאכן די רוסישע אויל אינדוסטריע כדי צו פארזיכערן אז קיין איין טראפ פון דעם ברענשטאף זאל קיינמאל נישט אנקומען קיין אמעריקע. די דעקלאראציע קומט אינאיינעם מיט דראמאטישע ווידעא קליפס וואס צייגן מאסיווע אויפרייסן און שווארצע רויך וואס קומט ארויס פון א רוסישע אויל סטארידזש פאסילעטי, וואו מען זעט ווי ריזיגע אויל טאנקען זענען ארומגענומען מיט פלאמען.

דאס איז די לעצטע עסקאלאציע אין א ברייטע דראון קאמפיין וואס האט שוין פאראליזירט מער ווי האלב פון רוסלאנד'ס רעפיינערי קאפאציטעט, אפהאקנדיג איינע פון די וויכטיגסטע קוואלן וואס פאנדן דעם קרעמלין'ס קריגס מאשין. די ציפערן צייגן ווי סוקסעספול דער קאמפיין איז געווארן, ווען די אוקראינישע אטאקעס האבן אראפגעדרוקט די רוסישע רעפיינערי אפעראציעס צו ארום 60 פראצענט קאפאציטעט. דער דראסטישער פאל קומט אן פיל ווייטער ווי ביים שלאכטפעלד, און מאכט זיך שפירן ביי גאז סטאנציעס און דיזעל מארקעטן איבער דער גאנצער וועלט.

פרעזידענט טראמפ האט שוין עטליכע מאל געלייגט דרוק אויף אוקראינע נאכצולאזן די אטאקעס אויף די רעפיינעריס, באשולדיגנדיג אז די סטרייקס זענען שולדיג אין די הויכע גלאבאלע דיזעל פרייזן. טראמפ האט אפילו דירעקט געלייגט פרעשור אויף דעם אוקראינישן פרעזידענט זעלענסקי אין טעלעפאנישע געשפרעכן זיך צוריקצוציען דערפון. אבער א הויכראנגיקער אוקראינישער באאמטער האט לעצטנס געזאגט פאר די 'פיינענשעל טיימס' אז די אטאקעס וועלן אנגיין אומגעשטערט, אפילו נאכדעם וואס טראמפ האט אויסגעהאמערט א דיזעל סופליי אפמאך דירעקט מיט פוטין.

קיעוו בלייבט ביי איר שטעלונג, טענה'נדיג אז דאס פאראליזירן רוסלאנד'ס מעגליכקייט צו פאנדן איר מלחמה איז פיל וויכטיגער ווי סיי וועלכע דיפלאמאטישע אומבאקוועמליכקייט וואס די אטאקעס קענען ברענגען. באאמטע זאגן קלאר אז עס איז נישט דא קיין שום צייכן אז די סטראטעגיע זאל זיך טוישן אין די נאענטע צוקונפט.