רוסישער 'סטאנטמאן' גייט וויירעל נאכן איבערדרייען א פיק-אפ טראק אינאיינעם מיט א מיליטערישע העליקאפטער

א רוסישער סטאנטמאן און קאנטענט קריעיטאר, יעווגעני טשעבאטארעוו, איז דעם וויקענד געגאנגען 'וויירעל' אויף די סאשעל מידיא פלאטפארמעס, נאכדעם וואס א ווילדע פרואוו צו שלעפן א מיליטערישע 'Mi-2' העליקאפטער אויפן דאך פון א פיק-אפ טראק האט זיך געענדיגט מיט א קראך, ווען סיי דער טראק און סיי דער העליקאפטער האבן זיך איבערגעדרייט אויף א דראמאטישן אופן.

דעשקעם ווידעא פונעם אינצידענט צייגט ווי דער טראק פלאגט זיך צו פארן אויף אן אומגעפלאסטערטע שמוץ-וועג אונטער די שווערע וואג פונעם העליקאפטער, ביז ער פארלירט אינגאנצן דעם באלאנס, דרייט זיך איבער אויף די זייט, און שלעפט מיט זיך אראפ דעם גאנצן העליקאפטער.

דער 35-יעריגער סטאנטמאן, וועלכער איז באזירט אין ראסטאוו-אן-דאן, האט פראבירט צו פירן דעם העליקאפטער א שטרעקע פון ארום 10 קילאמעטער צו א לאקאציע וואו ער האט געדארפט פילמען א ווידעא. ער האט אבער נישט גענוצט די ריכטיגע טראנספארטאציע עקוויפמענט, וואס האט געפירט דערצו אז די שווערע לאסט זאל זיך רוקן אינמיטן וועג און איבערדרייען דעם טראק.

טראץ דעם שרעקליכן קראך, האט זיך עס געענדיגט רעלאטיוו גוט. קיינער איז נישט ערנסט פארוואונדעט געווארן, און בלויז איינע פון די פליגלען פונעם העליקאפטער איז געשעדיגט געווארן. ווי עס פאסט פאר אים, האט ער באלד פארראכטן דעם שאדן און ווייטער געפילמט זיין קאנטענט אויפן ארט, און ער פלאנט שוין אן ענליכע שטיקל מיט אן עראפלאן.

דאס איז נישט די ערשטע מאל וואס טשעבאטארעוו פירט דורך געפארפולע שטיקעס. ער איז שוין באקאנט מיט זיינע טייערע און עקסטרעמע סטאנטס מיט לוקסוס קארס און מאטארסייקעלס. אין די פארגאנגענהייט האט ער זיך שוין ארויסגעשאסן דורך די פאדערשטע פענסטער פון א פארנדיגע מיניבאס, און האט אפילו איבערגעלעבט א סטאנט וואס האט אים געבראכן דעם רוקנביין. עס איז זיכער צו זאגן אז דאס וועט נישט זיין די לעצטע מאל וואס זיין נאמען מאכט קעפלעך נאך א סטאנט וואס האט זיך געענדיגט מיט א דורכפאל.