דראמאטישע סצענעס: א מאסיווע אויפרייס אויף א הויפט בריק אין קיעוו נאך א רוסישע דראון אטאקע

דראמאטישע ווידיאוס וואס צירקולירן אויפן אינטערנעט צייגן דעם שרעקליכן מאמענט ווען א מאסיווע אויפרייס האט אויפגעטרייסלט דעם "נארדערן" (פיווניטשני) בריק אין קיעוו, שיקנדיג א ריזיגע פייער-באל און שווארצע רויך אין די לופטן, בשעת קארס זענען נאך געווען אויפן בריק. באשטעטיגטע באריכטן פון די בי-בי-סי, סי-ען-ען, און אוקראינישע באאמטע געבן איבער אז א רוסישע דזשעט-געטריבענע דראון האט אריינגעקראכט אינעם בריק דעם פערטן אקטאבער, פארוואונדענדיג צוויי ציווילע בירגער און אנגעמאכט שווערע שאדנס צום שאסיי.

דער בריק איז איינע פון קיעוו'ס מערסט קריטישע טראנספארטאציע רוטס, וואס פארבינדט די אבאלאן און טראיעשטשינא געגנטער איבערן דניפרא טייך, און דינט אלס א הויפט וועג וואס טראגט הונדערטער טויזנטער מענטשן פון די מזרח סובורבס צום צענטער פון שטאט. דער קיעווער מעיאר וויטאלי קליטשקא האט באשטעטיגט אז די אטאקע האט אויך חרוב געמאכט די עלעקטרישע ווייערס פאר די טראלי-באסעס וואס פארן אריבער דעם בריק. דאס האט געצווינגען די לאקאלע אויטאריטעטן אפצושטעלן עטליכע באס רוטס, און פארארדענען אז דער טראפיק זאל אריבערפארן דורכן פאדילסקי בריק אנשטאט.

דאס איז שוין די צווייטע טאג נאכאנאנד וואס דער נארדערן בריק ווערט געצילט, און עס איז א טייל פון א ברוטאלע פיר-טאגיגע קאמפיין אין וועלכע רוסישע דראונס האבן כסדר באמבארדירט קיעוו'ס בריקן איבערן דניפרא טייך. די רוסישע פארטיידיגונגס מיניסטעריום האט פארענטפערט די אטאקעס, טענה'נדיג אז די בריקן ווערן גענוצט צו פירן אוקראינישע טרופן און מיליטערישע סופלייס. אבער אוקראינישע באאמטע זאגן אז די אטאקעס זענען פשוט געצילט אפצושניידן די הויפטשטאט אין צווייען.

דער אוקראינישער פרעזידענט וולאדימיר זעלענסקי האט געזאגט אז רוסלאנד האט ארויסגעשאסן מער ווי 1,900 אטאקע דראונס אויף אוקראינע בלויז אין די לעצטע וואך, אריינגערעכנט איבער 800 דזשעט-געטריבענע דראונס. דערווייל סיגנאליזירט מאסקווע אז די קאמפיין קעגן די קיעווער בריקן איז ווייט פון פאריבער. פאר א שטאט וואס גרייט זיך שוין אויף וואס קומט נעקסט, איז דער מעסעדזש פון די רוסישע באאמטע געווען גאר קלאר: דאס איז בלויז געווען איין אטאקע אין א פיל גרעסערע עסקאלאציע וואס קומט נאך.