ברוך השם: צוויי מענטשן ארויס אומגעשעדיגט נאכדעם וואס א העליקאפטער האט געמאכט אן עמערדזשענסי לאנדונג אין ניו זשערסי

דינסטאג אינדערפרי, נאוועמבער 10, האט פאסירט א שרעקעדיגע אינצידענט ווען א "בעל 206" העליקאפטער האט געמאכט אן עמערדזשענסי לאנדונג נעבן די "פארט ליבערטי קאנטעינער טערמינאל" אין בעיון, ניו זשערסי. ברוך השם זענען ביידע פאסאזשירן וואס זענען געווען דערין ארויס גענצליך אומגעשעדיגט.

דער אינצידענט האט זיך אנגעהויבן ארום 8:55 אינדערפרי, ווען דער פיילאט האט אריינגערופן א "מעידעי" עמערדזשענסי רוף, איבערגעבנדיג אז ער שפירט ערנסטע פראבלעמען מיטן מאטאר פונעם העליקאפטער און ער מוז זאפארט מאכן אן עמערדזשענסי לאנדונג. בשעת די שווערע לאנדונג האט זיך די אונטערשטע טייל פונעם העליקאפטער אפגעבראכן.

טראץ דעם וואס דער העליקאפטער איז שטארק צעשמעטערט געווארן, זענען ביידע מענטשן וואס זענען געווען דערין ארויס אן קיין קריץ. די 'עף-עי-עי' (FAA - פעדעראלע אוויאציע אדמיניסטראציע) האט געמאלדן אז זיי האבן געעפנט אן אויספארשונג צו דערגיין די פונקטליכע אומשטענדן וואס האבן געפירט צו די עמערדזשענסי לאנדונג.