שפאנונג אין מיטל מזרח: צוויי אויל טאנקערס אין פלאמען אינעם הארמוז דורכגאס נאך אויפרייסן פון איראנער ים-מינעס

באריכטן געבן אן אז צוויי אויל טאנקערס זענען איבערגעלאזט געווארן אין פלאמען אינעם סטראטעגישן 'הארמוז דורכגאס', נאך מאסיווע אויפרייסן וואס די איראנער רעוואלוציאנערע גווארדיע (IRGC) נעיווי זאגט איז געקומען פון ים-מינעס. אין א סטעיטמענט וואס איז פארשפרייט געווארן דורך די איראנער מידיא, האט די גווארדיע געזאגט אז די שיפן האבן פרובירט צו נאוויגירן דורך רוטס וואס טעהראן באטראכט אלס אומאויטאריזירט, וואס דאס האט אקטיוויזירט די אויפרייסן און אריינגעשליידערט די שיפן אין פלאמען.

די איראנער 'פארס' נייעס אגענטור האט אויך ארויסגעשטעלט ווידעא קליפס וואס צייגט לויט זיי ווי די טאנקערס רייסן אויף נאכן אנשטויסן די מינעס, כאטש וואס די ווידעאס זענען נאכנישט אומאפהענגיג באשטעטיגט געווארן צו דאס איז טאקע די אורזאך פונעם אינצידענט. די רעוואלוציאנערע גווארדיע האט אראפגעריסן די שיפן אלס "פארברעכערישע" טאנקערס וואס האבן גענומען אן "אומלעגאלע רוט" דורכ'ן וואסער. איראנער באאמטע האבן ווייטער באשולדיגט אז די שיפן האבן פארלעצט די נאוויגאציע רעגולאציעס, און האבן געווארנט אז אנדערע שיפן קענען אויסשטיין ענליכע קאנסעקווענצן אויב זיי איגנארירן טעהראן'ס אינסטרוקציעס. דערווייל האבן די באריכטן נישט קאנפירמט די אידענטיטעט פון די טאנקערס, אונטער וועלכע פאן זיי פארן, ווער עס אפערירט זיי, אדער דעם צושטאנד פון די מאנשאפט דערויף.

די אינצידענטן קומען אין א צייט פון גאר הויכע שפאנונגען איבער די קאנטראל פונעם הארמוז דורכגאס, וואס איז איינע פון די וועלט'ס וויכטיגסטע וואסער-וועגן פאר אינטערנאציאנאלע אויל און גאז טראנספארטאציע. איראן זוכט כסדר ארויפצוצווינגען רעסטריקציעס אויף קאמערציאלע שיפן וואס נוצן דעם דורכגאס, בעת די פאראייניגטע שטאטן האלט אן איר נעיווי בלאקאדע אויף איראנער פארטן און טשעלענדזשט טעהראן'ס פרואוון צו קאנטראלירן דעם טראפיק אויפ'ן וואסער.

די איראנער גווארדיע האט שוין עטליכע מאל געווארנט שיפן קעגן קאאפערירן מיט די אמעריקאנער קרעפטן אדער פרובירן אדורכצופארן רוטס וואס זיי האבן דערקלערט אלס פארבאטן, וואס דאס ברענגט גרויס זארג צווישן שיף אפערירער איבער די ריזיקעס פון פארן אין די געגנט. די 'רויטערס' נייעס אגענטור האט באריכטעט אז עטליכע טאנקערס האבן זיך אונטערגעצינדן אין די לעצטע טעג, און ים-אינצידענטן און אטאקעס גייען אן טראץ די דיפלאמאטישע פרואוון צו נידערן די שפאנונגען.

סיי וועלכע באשטעטיגטע שאדן צו אויל טאנקערס אדער די אנוועזנהייט פון ים-מינעס קען ווייטער שטעלן אין געפאר די קאמערציאלע שיפעריי, ענערגיע סופלייען און די גלאבאלע אויל מארקעט. אומאפהענגיגע באשטעטיגונג איבער די לעצטע אויפרייסן, אריינגערעכנט די אורזאך פון די פייערן און דער סטאטוס פון די מאנשאפט, בלייבט קריטיש וויכטיג אין ליכט פון די קאנפליקטינג קלעימס וואס קומען ארויס פון דעם ראיאן.