קאנאדע לייגט צוריק ארויף שווערע סאנקציעס אויף 11 איראנער פירמעס און בענק צוליב נוקלעארע זארגן

קאנאדע האט צוריק ארויפגעשטעלט סאנקציעס אויף 11 איראנער ענטיטיס, אריינגערעכנט די 'נעשאנאל איראניען אויל קאמפאני', די 'נעשאנאל איראניען טענקער קאמפאני' און עטליכע גרויסע פינאנציעלע אינסטיטוציעס. דאס קומט אלס רעזולטאט פון זייער אנגעבליכע פארמישונג אין איראן'ס נוקלעארע אקטיוויטעטן, באליסטישע מיסיל פראגראם, און די פינאנציעלע נעצן וואס שטיצן דאס.

די קאנאדישע אויסערן מיניסטארשע, אניטא אנאנד, האט געמאלדן די נייע שריט דעם 10'טן נאוועמבער ביי די G7 אויסערן מיניסטארן פארזאמלונג אין פאריז. זי האט קלארגעשטעלט אז אטאווע פלאנירט צו באגרעניצן טעהראן'ס צוטריט צו פאנדן און סענסיטיווע טעכנאלאגיעס.

צווישן די ארגאניזאציעס וואס זענען געווארן געצילט ציילן זיך 'בענק מעלאט', 'בענק מעלי איראן', די 'בענק אוו אינדוסטרי ענד מיין', די 'עקספארט דעוועלאפמענט בענק אוו איראן', און די 'איראן אינשורענס קאמפאני', אינאיינעם מיט נאך דריי אנדערע ענערגיע און נוקלעאר-פארבינדענע פירמעס.

"קאנאדע'ס פאזיציע איז קלאר און אומצוויידייטיג: מען טאר קיינמאל נישט ערלויבן פאר איראן צו באקומען א נוקלעארע וואפן," האט אנאנד דעקלערט.

אלע 11 ענטיטיס זענען פריער אראפגענומען געווארן פון קאנאדע'ס סאנקציעס ליסטע אין יאר 2016, נאכדעם וואס איראן האט גענומען שריט אונטער די 2015 נוקלעארע אפמאך. אבער קאנאדע זאגט אז די באנייטע זארגן איבער איראן'ס נוקלעארע אקטיוויטעטן און איר נאכאנאנדע דורכפאל צו קאאפערירן מיט די 'אינטערנאציאנאלע אטאמישע ענערגיע אגענטור' (IAEA) האט געפירט צום באשלוס צוריקצושטעלן די באגרעניצונגען.

אונטער די באנייטע מאסנאמען, זענען מענטשן און ארגאניזאציעס אין קאנאדע, ווי אויך קאנאדישע בירגער אין אויסלאנד, פארבאטן פון דורכפירן ספעציפישע פינאנציעלע און פארמעגן טראנזאקציעס וואס זענען פארבינדן מיט די דערמאנטע פירמעס. אטאווע זאגט אז די באגרעניצונגען זענען געצילט צו צעשטערן די פינאנציעלע נעצן וואס קענען שטיצן איראן'ס נוקלעארע און מיסיל פראגראמען, בשעת'ן באגרעניצן זייער צוטריט צו סענסיטיווע טעכנאלאגיעס און געלט קוואלן.

די 11 ארגאניזאציעס נעמען ארום עטליכע סטראטעגישע סעקטארן, אריינגערעכנט אויל פראדוקציע, שיפינג, נוקלעארע ברענשטאף איינהאנדלונג, בענקינג און אינשורענס, וואס פארברייטערט די סאנקציעס פיל ווייטער ווי בלויז אינדיווידועלע באאמטע אדער רעגירונג פירער. מיט די יעצטיגע מעלדונג, זאגט קאנאדע אז זי האט שוין ארויפגעשטעלט 25 רונדעס פון סאנקציעס וואס נעמען אריין 237 איראנער פערזאנען און 276 ענטיטיס.

דער שריט פארשטארקט אויך די קאארדינאציע מיט די G7 שותפים, וועלכע האבן געפאדערט פון טעהראן נאכצוקומען אירע אינטערנאציאנאלע פארפליכטונגען און צוריק אנהייבן א פולע קאאפעראציע מיט די נוקלעארע אינספעקטארן. בעת קאנאדע האלט זיך ביי דעם אז די מאסנאמען זענען געצילט צו פארמיידן נוקלעארע פארשפרייטונג און פארשטארקן אינטערנאציאנאלע זיכערהייט, האלט איראן כסדר אין איין טענה'ן אז איר נוקלעארע פראגראם איז בלויז פאר פרידליכע צוועקן.