מישיגען – בלויז עטליכע טעג פאר די נאוועמבער וואלן, גייט ארום א נייע שארפע אטאקע רעקלאמע (עד) קעגן אבדול על-סאיעד, דער דעמאקראטישער נאמינירטער פאר די אפענע יו. עס. סענאט זיץ אין מישיגען. די רעקלאמע ברענדמארקט על-סאיעד אלס א ראדיקאל וואס שטיצט "אפענע גרעניצן" (אפען בארדערס) און איז קעגן דעפארטאציעס.

די עד ברענגט ארויס ווי ער זאגט אז אמעריקע איז שולדיג פאר די וועלט צו עפענען אירע טויערן, און טענה'ט אז ער זעט נישט קיין שום חילוק צווישן אן אומלעגאלער אימיגראנט און אן אמעריקאנער בירגער. די רעקלאמע ענדיגט זיך מיט א רוף צו די וויילער אפצוווארפן די "אנטי-אמעריקאנער משוגעת".

על-סאיעד, א פראגרעסיווער דעמאקראט און געוועזענער פובליק העלט דירעקטאר אין דעטרויט און וועין קאונטי, האט געבויט זיין קאמפיין אויף די צוזאג צו אפשאפן די 'אייס' (ICE) אגענטור און איינשטעלן 'מעדיקעיר פאר אלע'. ער לויפט יעצט קעגן דעם רעפובליקאנער קאנדידאט מאיק ראדזשערס, אין א פארמעסט וואס איז געווארן א הויפט פונקט אין די נאציאנאלע אימיגראציע דעבאטע.

פון די אנדערע זייט, האט על-סאיעד'ס קאמפיין אראפגעלייגט זיין פאזיציע אביסל אנדערש. זיי זאגן אז ער שטיצט יא צו באוואכן דעם בארדער און דורכפירן א ברייטע אימיגראציע רעפארם, אבער ער האלט נאך אלס אז מען דארף צעווארפן די 'אייס' אגענטור, וועלכע ער רופט א "פארא-מיליטערישע קראפט וואס אפערירט אינדרויסן פון קאנסטיטוציאנאלע גרעניצן".

דער גרויסער חילוק צווישן זיין אפיציעלע פלאטפארמע און וויאזוי זיינע קעגנערס לייגן אים אראפ, איז געווארן די צענטראלע טעמע אין די לעצטע טעג פונעם פארמעסט. אימיגראציע איז ארויסגעשטאנען אלס איינע פון די הויפט חילוקים צווישן על-סאיעד און ראדזשערס, און די נייע רעקלאמע צייגט אז די אישו וועט דאמינירן די לעצטע פאזע פונעם קאמפיין, ווען ביידע לאגערן יאגן זיך צו מאכן זייער לעצטע אפיל צו די מישיגען וויילער בעפאר זיי גייען צו די שטים בודקעס.