כאאס אין פאריז: פאליציי נוצט טרערן-גאז און וואסער קאנאנען צו צעטרייבן מאסיווע פראטעסטן

פאריז איז פארוואנדלט געווארן אין א רעגנדיגע שלאכטפעלד דעם פארגאנגענעם שבת, אקטאבער 24, ווען פראנצויזישע ראיאטן-פאליציי האבן זיך אנגעשטויסן מיט שווארץ-געקליידעטע מיליטאנטן ביים ענדע פון א מאסיווע דעמאנסטראציע.

א ווידעא פונעם ארט צייגט ווי פאליציי אפיצירן אין פולע עקוויפמענט רייסן זיך אדורך די געדיכטע רויך פון טרערן-גאז. לויט באריכטן האבן די פראטעסטירער פרובירט אויפצושטעלן מעטאלענע באריקאדעס מיט'ן ציל צו פארכאפן די פאליציי אינעווייניג, כאטש אפיציעלע קוועלעס האבן דאס נאכנישט באשטעטיגט. וואס איז יא קלאר איז, אז די פאליציי האט גענוצט טרערן-גאז און וואסער קאנאנען נאכדעם וואס טייל פראטעסטירער האבן אנגעהויבן ווארפן פלעשער און שטיינער אויף די אפיצירן.

די מאסיווע פראטעסטן, וואס זענען ארויסגערופן געווארן צוליב די שווערע לעבנס-קאסטן, אומגליכקייטן און שניטן אין שולע פאנדינג, האבן ארויסגעצויגן ארום 110,000 מענטשן אין פאריז אליינס, און א געשאצטע 410,000 איבער גאנץ פראנקרייך.

רוב פונעם פראטעסט איז אריבער פרידליך און איז געהאלטן געווארן אונטער שטרענגע קאנטראל ביים עק פון שטאט. אבער די אויטאריטעטן געבן איבער אז ארום 500 ראיאטירער האבן זיך פארמישט אין געשלעגן מיט די פאליציי. דאך איז די געוואלדטאטן געווען מילדער ווי דעם פריערדיגן וואך. א שווערע רעגן האט געהאלפן אפקילן די געמיטער און פארמיטן די פילע פייערן וואס האבן באגלייט די פריערדיגע אומרוען. פאריזער פראקורארן האבן באריכטעט 64 ארעסטן.

דער אפאזיציע פירער, זשאן-לוק מעלענשאן, האט שארף פארדאמט די פאליציי און זיי באשולדיגט אין שיסן אויף פראטעסטירער אן קיין אונטערשייד. דערווייל ווערן שוין גערופן פרישע פראטעסטן, און עס בלייבט די פראגע ווער די אגרעסיווע מיליטאנטן זענען באמת, וואס זייערע פלענער זענען, און צי די שווערע פאליצייאישע רעאקציע בארואיגט דעם מצב אדער גיסט נאר צו אויל צום פייער.