נאך א טויטליכע אטאקע האט באטראפן די וואסערן ארום דעם הארמוז דורכגאס, און דאסמאל איז דער קרבן געווען א קליינע אינדיאנער פראכט-שיף. דעם 2'טן נאוועמבער איז די שיף, וואס טראגט דעם נאמען "MSV Al Jusufi", געטראפן געווארן דורך וואס דער אינדיאנער שיפינג מיניסטער, סארבאנאנדא סאנאוואל, האט אנגערופן אן "אומאידענטיפיצירטע לופט אביעקט" נעבן די ברעגעס פון אמאן.

איינער פון די 14 אינדיאנער מאנשאפט מיטגלידער איז אומגעקומען פון זיינע וואונדן, בעת די אמאן קאסט-גארד האט באוויזן צו ראטעווען די איבעריגע 13. די אינדיאנער שיפינג מיניסטעריום און זייער עמבעסי אין אמאן ארבעטן יעצט אינאיינעם מיט די לאקאלע אויטאריטעטן צו העלפן די איבערלעבער און צוריקברענגען אהיים דעם קערפער פונעם אומגעקומענעם מאטראז.

די אינדיאנער אויסערן מיניסטעריום האט שארף פארדאמט די אטאקע און געפאדערט פון אלע זייטן צו נידערן די אנגעצויגנקייט און אויפהערן צילן קאמערציאלע שיפן. דערווייל האט נאך קיינער נישט גענומען פאראנטווארטליכקייט אויף די אטאקע און עס איז נישט קלאר ווער עס האט געשאסן דעם פראדזשעקטייל.

אבער דאס איז נישט געווען די איינציגסטע שיף וואס איז געטראפן געווארן. בלויז א טאג פריער, איז אן עמיראטישע שלעפ-שיף מיטן נאמען "Selat Storm" געטראפן געווארן פון א פראדזשעקטייל אינעם הארמוז דורכגאס. לכתחילה איז באריכטעט געווארן אז די שיף זינקט טיילווייז, אבער א פרישע נאוויגאציע ווארענונג אפדעיט גיט איבער אז די שיף איז שוין אינגאנצן אונטערגעגאנגען ארום 0.6 נאטישע מייל מערב פון "דזשאזיראט אום אל גהאנאם". פריערדיגע באריכטן האבן נישט אנגעגעבן קיין דעטאלן איבער וואס עס איז געשען מיט די מאנשאפט פון די שיף.

די אטאקעס קומען אין א צייט וואס איראן האלט ווייטער דעם דורכגאס פארמאכט, און קאטאר פרובירט צו פארהאנדלען א פלאן צו באנייען די געשפרעכן, בעת א הויכראנגיקער איראנער באאמטער זאגט אז אן אפמאך איז נאך ווייט פון רעאליטעט. דאס לאזט איבער שווערע פראגעס אין דער לופטן: ווער שטייט אונטער די אטאקעס? וויפיל נאך שיפן וועלן געטראפן ווערן? און צי קען דיפלאמאטיע זיך רוקן שנעלער ווי דער קומענדיגער מיסיל?