דראמאטישע באהויפטונג: איראן זאגט אז 3 אויל טאנקערס זענען אין פלאמען נאכן אנטרעפן ים-מינעס אינעם הארמוז דורכגאס

איראן'ס רעוואלוציאנערע גווארדיע (IRGC) נעיווי האט ארויסגעשטעלט א קלעים אז דריי אויל טאנקערס האבן אריינגעקראכט אין ים-מינעס און זענען ארויף אין פלאמען איבערנאכט אינעם סטראטעגישן הארמוז דורכגאס. לויט די איראנער, איז דאס פאסירט נאכדעם וואס די שיפן האבן אויסגעלאשן זייערע נאוויגאציע און אידענטיפיקאציע סיסטעמען.

דערווייל איז דער באריכט נישט באשטעטיגט געווארן דורך קיין שום זעלבסטשטענדיגע קוועלע, און קיין איין אינטערנאציאנאלע אגענטור האט נישט קאנפירמירט די עקזיסטענץ פון די שיפן, די אויפרייסן, אדער די שאדנס. די רעוואלוציאנערע גווארדיע האט שוין אין די פארגאנגענהייט געמאכט ענליכע סטעיטמענטס, ווארנענדיג אז שיפן וואס פרובירן צו פארן אויף וואס זיי רופן "אומאויטאריזירטע רוטס" שטעלן זיך אין א סכנה פון אריינפארן אין מינעס וואס זיי האבן אונטערגעלייגט.

וויבאלד ארום א פינפטל פון די וועלט'ס אויל פארט דורך דעם דורכגאס, ציט יעדע קלעים איבער ברענענדיגע טאנקערס גלייך די אויפמערקזאמקייט פון די גאנצע וועלט.

די מעלדונג קומט אין א צייט פון שווערע אנגעצויגנקייטן אין די וואסערן אין די לעצטע וואכן. איראנער באאמטע זאגן אז זיי האבן רעקארדירט כאטש 16 אינצידענטן מיט שיפן און אויל טאנקערס זינט אנהייב אקטאבער, אריינגערעכנט מינע אויפרייסן, בשעת די אמעריקאנער מיליטער האט געמאלדן אז זיי האבן אפגערייניגט די הויפט טראנזיט רוטס פון די ים-מינעס.

אין די זעלבע צייט האט א בריטישע מאריטים מאניטאר גרופע באריכטעט איבער אן אנדערע שיף וואס ברענט, כאטש עס איז נישט קלאר צי יענע שיף איז איינע פון די דריי וואס די איראנער האבן דערמאנט.

וויכטיגע דעטאלן פעלן נאך אלץ, אריינגערעכנט די נעמען פון די טאנקערס, ווער די אייגנטומער זענען, צי עס זענען דא פארוואונדעטע, און ווי גרויס די שאדן איז. ביז עס קומט אן א זעלבסטשטענדיגע באשטעטיגונג, בלייבט די גרויסע פראגע צי דאס איז אן אמת'ע קאטאסטראפע אויפ'ן וואסער, אדער בלויז נאך א דראמאטישע קלעים אין די אנגייענדיגע קאנפראנטאציעס.