בס"ד

באריכט: ראטגעבער דרוקן אויף פרעזידענט טראמפ צו פאדערן אז איראן זאל אינגאנצן אויפגעבן איר נוקלעארע פראגראם

עטליכע שטרענגע אינדרויסנדיגע ראטגעבער האבן לויט באריכטן געדרוקט אויף פרעזידענט דאנאלד טראמפ, אז ער זאל מאכן דאס פולשטענדיגע אויפגעבן פון איראן'ס נוקלעארע פראגראם אלס א הויפט ציל, בעת ער באטראכט די קומענדיגע פאזע אינעם קאנפליקט מיט טעהראן.

לויט א באריכט אין די 'וואל סטריט דזשורנאל', וועלכע ציטירט אמעריקאנער באאמטע און קוועלער נאנט צו די געשפרעכן, האבן די עדווייזערס קאנטאקטירט טראמפ נאכן 'עלעקשאן דעי', און ארגומענטירט אז דאס דעגרייכן אזא רעזולטאט קען ווערן א היסטארישע דערגרייכונג פון זיין פרעזידענטשאפט. זיי האלטן אז דאס צווינגען טעהראן אויפצוגעבן אירע נוקלעארע אמביציעס וועט געבן פאר טראמפ די מעגליכקייט אראפצושטעלן אז די פאליטישע און סטראטעגישע פרייז פונעם קריג האט זיך געלוינט.

אינערליכע דעבאטעס אין די אדמיניסטראציע
די פאזיציע פון די ראטגעבער קומט אין א צייט וואס די אדמיניסטראציע פלאגט זיך מיט פארשידענע קעגנזייטיגע רעקאמענדאציעס איבער ווי אזוי ווייטער צו גיין - צי מען זאל באנייען גרויסע מיליטערישע אפעראציעס, גיין דעם דיפלאמאטישן וועג, אדער אנהאלטן די עקאנאמישע דרוק אויף איראן.

לויט די באריכטן, זענען די פארטיידיגונגס סעקרעטאר פיט העגסעט און סענטקאם קאמאנדיר אדמיראל ברעד קופער, ביי די מיינונג אז מען דארף באנייען די מיליטערישע אקציעס. פון די אנדערע זייט, זענען וויצע פרעזידענט דזשעי. די. ווענס און ספעציעלער ענוווי סטיוו וויטקאף, שטארק פאר דיפלאמאטישע שריט.

דער סעקרעטערי אוו סטעיט מארקא רוביא און טרעזשערי סעקרעטאר סקאט בעסענט, זענען ענדערש פארן אנהאלטן אדער פארשטערקערן די סאנקציעס און די האנדל בלאקאדע, פרעזענטירנדיג עקאנאמישע דרוק אלס דער בעסטער וועג פאראויס.

דיפלאמאטישע פארזוכן און די קומענדיגע שריט
אינדערצייט וואס די אינערליכע דעבאטעס גייען אן, זענען דא דיפלאמאטישע פארזוכן דורך ראיאנישע פארמיטלער, אריינגערעכנט קאטאר, וועלכע פרובירן צו שאפן א פלאטפארמע פאר פארהאנדלונגען און צו לייזן דעם אישו פון צוריק עפענען דעם סטראטעגישן 'הארמוז דורכגאס'.

די פאדערונג פון די אינדרויסנדיגע עדווייזערס פאר א פולשטענדיגע נוקלעארע קאפיטולאציע איז א פיל ברייטערע ציל ווי בלויז גרייכן אן אפמאך צו ענדיגן די פיינטליכקייטן אדער צוריקשטעלן די שיפס-פארקער אינעם וואסער-וועג. צי טראמפ וועט אקצעפטירן די פאזיציע איז דערווייל אומקלאר, און די באריכטן צייגן נישט אז ער האט שוין געמאכט אן ענדגילטיגע באשלוס.

די ברייטע דעבאטע לאזט איבער א הויפט פראגע צייכן איבער די אמעריקאנער פאליסי: וועט וואשינגטאן גיין אין ריכטונג פון א פארהאנדלטע לעזונג, אנהאלטן די עקאנאמישע דרוק, אדער פרובירן צו צווינגען טעהראן צו מאכן נוקלעארע קאנצעסיעס דורך פרישע מיליטערישע אקציעס?