פאריז: פרישע געוואלדטאטן און צוזאמענשטויסן מיט די פאליציי ביי מאסן פראטעסטן פאר די פערטע וואך נאכאנאנד

פאריז איז ווידער אויפגעטרייסלט געווארן פון א פרישע רונדע פון כאאס און צוזאמענשטויסן אויף די גאסן דעם שבת, נאוועמבער 7, ווען די פאליציי האט זיך אנגעשטויסן מיט פראטעסטירער פאר די פערטע וואך נאכאנאנד פון אומרוען אין פראנקרייך.

נאך א מארש וואס האט זיך געצויגן פון די 'פלעיס דע לא רעפובליק' ביז די 'פלעיס דע לא נעישאן', האבן די אנגעצויגנקייטן אויסגעפלאצט צום סוף פונעם ראלי. לויט א באריכט פון די 'עי-עף-פי' נייעס אגענטור, האבן די פאליציי געשאסן טרערן גאז אויף די מאסן נאכדעם וואס פראטעסטירער האבן געווארפן פראדזשעקטיילס און זעלבסט-געמאכטע פייערוואקס. ארום 100 מענטשן זענען ארומגערינגלט געווארן דורך פאליציי אפיצירן, און צוויי פון די הויפט קאארדינירער פונעם פראטעסט זענען ארעסטירט געווארן.

'פאקס נייעס' באריכטעט אז די פראטעסטירער זענען ווייטער אנגעגאנגען מיט זייערע דעמאנסטראציעס טראץ דעם וואס די פאריזער פאליציי האט אפגעווארפן צענדליגע פארלאנגען פאר פערמיטן, אנווייזנדיג אויף די געוואלדטאטן ביי די ראיאטן אין אקטאבער וואס האט געפירט צו טויזנטער ארעסטן.

די אויפברויז אונטער די אלע אומרוען איז הויפטזעכטליך איבער די שווערע עקאנאמישע מצב. די דעמאנסטראנטן שרייען קעגן די הויכע קאסט אוו ליווינג, נידעריגע געהאלטן, שוואכע שולע קאנדיציעס און פראבלעמען מיט פובליק סערוויסעס. ארום 70,000 זיכערהייט קרעפטן זענען סטאנציאנירט געווארן דעם שבת, נאכדעם וואס די מאסן פראטעסטן פונעם 17'טן אקטאבער האבן זיך פארוואנדלט אין וואס 'עי-עף-פי' האט אנגערופן די ערגסטע ראיאטן וואס פראנקרייך האט געזען אין יארן.

די צאל באטייליגטע איז געווען נידעריגער ווי אין די פריערדיגע וואכן. די יוניאנס זאגן אז 75,000 מענטשן האבן זיך באטייליגט אינעם מארש אין פאריז, בעת די פאליציי האט געציילט ארום 46,000. רוב פון די דעמאנסטראנטן זענען בכלל נישט געווען פארמישט אין קיין שום געוואלדטאטן, אבער דאך חזר'ט זיך איבער דער זעלבער סצענאר: א פרידליכע מארש וואס ענדיגט זיך מיט ברוטאלע צוזאמענשטויסן. די באאמטע האבן דערווייל נאך נישט געטראפן קיין וועג וויאזוי אפצושטעלן די כאאס פון זיך איבערחזר'ן.

וויבאלד די עדיוקעישאן יוניאנס רופן שוין פאר פרישע סטרייקס אויף דעם קומענדיגן דינסטאג, בלייבט די גרויסע פראגע צי די באוועגונג הייבט אן זיך אפצוקילן, אדער צי זיי קלייבן בלויז אן פרישע כוחות פאר די קומענדיגע רונדע.