בס"ד

זעלטענע בליק: פאקס ניוז קארעספאנדענט באריכטעט פונעם אמעריקאנער 'דזשארדזש וואשינגטאן' עירקרעפט קעריער אינעם אראבישן ים

פאקס ניוז קארעספאנדענט טרעי אינגסט האט איבערגעגעבן א זעלטענעם בליק פון דער נאנט, דירעקט פונעם פלייט-דעק פונעם 'יו-עס-עס דזשארדזש וואשינגטאן' עירקרעפט קעריער, בעת די ריזיגע שיף אפערירט אינעם אראבישן ים. אין די ווידעא וואס ער האט פילמירט שפאצירנדיג אויפ'ן דעק, קען מען זען די מעכטיגע עף-18, עף-35 און אי-2 האק-איי קאמפס-פליגערס גרייט פאר אקציע, אינאיינעם מיט די מאטראסן, פילאטן, און די מאסיווע סטרוקטור פונעם קעריער.

די בילדער כאפן אויף די אינטענסיווע טעגליכע אקטיוויטעטן אויפ'ן 'נימיץ-קלאס' קעריער, וואס האלט אן א הויכע שטאפל פון אפעראציעס אן א פוס אפשטעל. דער באריכט שטעלט צו אן אומגעווענליכע אריינבליק אין איינע פון די מעכטיגסטע וואפן-געצייג פון די אמעריקאנער נעיווי, ספעציעל אין א צייט פון אנגעצויגענע שפאנונגען אינעם ראיאן.

דער דזשארדזש וואשינגטאן קעריער איז אריבערגעפירט געווארן פונעם אינדא-פאציפישן ראיאן אין אוגוסט 2026, איבערצונעמען דעם 'יו-עס-עס אברהם לינקאלן' נאכדעם וואס יענער האט פארענדיגט א לענגערע מיסיע. איר אנוועזנהייט איז געצילט צו שטיצן די אמעריקאנער זיכערהייט און אפשרעקונגס-מיסיעס נעבן דעם הארמוז-דורכגאס, אין ליכט פון די אנגייענדע קאנפליקט מיט איראן. די קעריער סטרייק גרופע אפערירט אונטער די כסדר'דיגע סטראשע פון איראנער מיסיל אטאקעס בעת זיי פירן אויס זייערע מיסיעס.

אינגסט'ס באריכט ברענגט ארויס סיי די מאסיווע פארנעם פון די אמעריקאנער מיליטערישע קראפט, און סיי די שווערע אומשטענדן מיט וואס די מאנשאפט פונעם שיף ספראוועט זיך טעגליך. די ווידעא ברענגט אויך ארויף פרישע פראגן איבער ווי לאנג אמעריקע קען אנהאלטן אזעלכע מאסיווע מיסיעס און איבער די אלגעמיינע סטראטעגישע פאזיציע אינעם מיטל-מזרח ראיאן.