איראן צייגט אונטערערדישע מיסיל טונעלן אין א נייע פראפאגאנדע ווידעא נאך אמעריקאנער אטאקעס

איראנ'ס איסלאמישע רעוואלוציאנערע גווארדיע האט ארויסגעגעבן א נייע ווידעא וואס צייגט ווי דער פארטרעטער פונעם העכסטן פירער צו די גווארדיע, אבדולא כאדזשי סאדעגי, באקוקט אונטערערדישע נעיווי מיסיל טונעלן אין דרום איראן.

די פוטעדזש, וואס איז פארשפרייט געווארן דורך איראנער סטעיט-פארבונדענע מידיא, צייגט טונעלן אנגעפילט מיט טראקס וואס טראגן אנטי-שיף מיסיל ארויסשיסערס, ווי אויך עקוויפמענט פאר שנעלע אטאקע שיפלעך. די באפעסטיגטע אונטערערדישע איינריכטונגען זענען ספעציעל געבויט געווארן צו באהאלטן די נעיווי וואפן און זיי קענען ארויסברענגען גאר שנעל צום בארטן פונעם פערסישן איינגאס.

די פרישע ווידעא איז ארויסגעשטעלט געווארן קוים איין טאג נאך די באריכטעטע אמעריקאנער אטאקעס אויפן 'קעשם אינזל', א שריט וואס פילע אנאליסטן זעען אלס מער ווי בלויז א צופאל.

דער מעסעדזש פון איראן שיינט צו זיין א פראוו אפצושרעקן אמעריקע און אירע אליאירטע. די איראנער סטראטעגיע, ווי עס ווערט פרעזענטירט אין די ווידעא, איז צו סטראשען די קאמערציאלע שיפס-פארקער דורכן 'הארמוז דורכגאס' מיט מיסילס און שיפלעך וואס זענען באשיצט פון אטאקעס. דאס איז אן ערנסטע סטראשע, וויבאלד דער דורכגאס איז איינע פון די וועלט'ס וויכטיגסטע שיפינג רוטס.

פונדעסטוועגן, וויבאלד די ווידעא קומט פון די רעוואלוציאנערע גווארדיע און רעגירונגס קוועלעס, איז עס פונקט אזוי פראפאגאנדע ווי א פאקטישע באווייז, און עס איז נישט דא קיין אומאפהענגיגע באשטעטיגונג וואס די טונעלן פארמאגן באמת אדער ווי גרייט די וואפן זענען. די אפענע פראגעס יעצט זענען וויפיל פון דעם ארסענאל האט איבערגעלעבט די באריכטעטע אמעריקאנער אטאקעס, און ווי אזוי וואשינגטאן און די גאלף לענדער וועלן רעאגירן צו די נייע אנטוויקלונגען.