היסטארישע איבערקערעניש אין סערביע: פרעזידענט וואוטשיטש אנערקענט נידערלאגע נאך וואלן קעגן 'סטודענטן ליסטע'

זונטאג ביינאכט האט זיך אפגעשפילט א היסטארישע פאליטישע ערדציטערניש אין סערביע, ווען דער לאנגיעריגער פירער אלעקסאנדאר וואוטשיטש האט אפיציעל אנערקענט זיין נידערלאגע אין די פריצייטיגע פארלאמענטארע וואלן צו די אזוי-גערופענע 'סטודענטן ליסטע' - א פאליטישע באוועגונג וואס איז ארויסגעוואקסן פון גאסן פראטעסטן.

קורץ נאכדעם וואס די שטים בודקעס האבן זיך פארמאכט, האט וואוטשיטש ארויסטרעטנדיג צו די פרעסע געזאגט אז עס איז קלאר אז זיין 'סערבישע פראגרעסיווע פארטיי' האט פארלוירן די מאכט. לויט די פאראויסגעשאצטע רעזולטאטן, צייגט זיך אז די סטודענטן ליסטע וועט געווינען צווישן 135 און 140 זיצן אינעם 250-זיציגן פארלאמענט, קעגן ארום 105 זיצן פאר וואוטשיטש'ס פארטיי.

די שטימען ציילונג ווייזט אז די נייע באוועגונג האט באקומען ארום 51 ביז 53 פראצענט, קעגן 40 פראצענט פאר וואוטשיטש, ביי א גאר הויכע וויילער באטייליגונג. די פונקטליכע ציפערן קענען זיך נאך אביסל רוקן אהין אדער אהער וויבאלד מען האלט נאך אינמיטן פיינעלייזן די ציילונג.

גלייך נאך די נייעס האבן אויסגעבראכן מאסיווע סעלעברעישאנס איבער די הויפטשטאט בעלגראד. צענדליגער טויזנטער מענטשן האבן איבערגעפילט די הויפט גאסן, פייערווערק האבן באלאכטן דעם הימל, און מענטשן האבן געפייערט מיט פייפערס און פלאגן. ווידיאוס וואס צירקולירן אנליין ווייזן ווי רייאט פאליציי און געפאנצערטע טראקס ציען זיך ארויס פון צענטראל בעלגראד אינמיטן די נאכט אונטער די געשרייען פון די מאסן, כאטש די בילדער זענען נאכנישט אומאפהענגיג באשטעטיגט געווארן.

די 'סטודענטן ליסטע' איז געבוירן געווארן נאך כמעט צוויי יאר פון העפטיגע אנטי-קארופציע פראטעסטן. די פראטעסטן האבן זיך אנגעהויבן נאך א טראגישע פאסירונג אין יאר 2024, ווען א דאך ביי די נאווי סאד באן סטאנציע איז איינגעפאלן און אומגעברענגט 16 מענטשן. די באוועגונג האט ארויסגעשטעלט קאנדידאטן פון פראפעסיאנעלע פעלדער, ווי דאקטוירים און לערערס, רוב פון זיי אן קיין שום פריערדיגע פאליטישע עקספיריענס. רוב פון די אנדערע אפאזיציע פארטייען האבן זיך ארויסגעצויגן פונעם פארמעסט כדי זיי צו געבן א קלארן וועג צום זיג.

יעצט בלייבן איבער גרויסע פראגע צייכנס ווי אזוי די טראנזישאן פון מאכט וועט צוגיין, און וואס עס וועט פאסירן מיט די אליאירטע פון דעם ביז-איצטיגן פירער וואוטשיטש. די וועלט און די ארטיגע בירגער קוקן יעצט ארויס מיט שפאנונג צו זען ווי אזוי א פראטעסט-באוועגונג אן קיין קלארע פירערשאפט וועט קענען פירן א רעגירונג, ווי אזוי זיי וועלן זיך ספראווען מיט די קארופציע פראבלעמען, און וואספארא דיפלאמאטישע באציאונגען זיי וועלן האבן מיט די יוראפישע יוניאן און מיט רוסלאנד.