פרעזידענט טראמפ שיקט א שארפע ווארענונג קיין טעהראן: "אמעריקע קען חרוב מאכן איראן'ס נוקלעארע בארג אין בלויז איין שעה"

פרעזידענט דאנאלד טראמפ האט ארויסגעשיקט א דירעקטע מעסעדזש קיין טעהראן, און ער האט דאס געטאן לייוו אויף 'פאקס ניוז'. אין אן אינטערוויו מיט שאן הענעטי מאנטאג ביינאכט, האט דער פרעזידענט געזאגט אז אמעריקע וועט מעגליך דארפן אטאקירן איראן'ס באקאנטע "פיקעקס מאונטעין" נוקלעארע פאסיליטי. טראמפ האט עס אוועקגעמאכט אלס "נישט קיין גרויסע דיעל", זאגנדיג אז עס קען ווערן דורכגעפירט אין ממש איין שעה, סיי ווען וואשינגטאן זאל נאר וועלן.

זיינע ווערטער זענען געקומען בלויז עטליכע שעה נאכדעם וואס אמעריקאנער קרעפטן האבן דורכגעפירט א באגרעניצטע סטרייק אויף איראן'ס 'קעשם איילענד'. לויט ווי אן אמעריקאנער אפישעל האט איבערגעגעבן, איז די אטאקע געקומען אלס רעאקציע צו א מיסיל וואס איז געשאסן געווארן אויף אן אמעריקאנער עראפלאן נעבן די 'סטרעיט אף הארמוז'.

אינעם אינטערוויו האט טראמפ קלארגעשטעלט אז איראן וועט קיינמאל נישט באקומען קיין נוקלעארע וואפן. אינאיינעם מיט דעם האט ער אבער אנגעוויזן אז עס איז דא א זייער גוטע טשאנס פאר א "דיעל", אבער האט געווארנט אז פרישע קאמפן קענען אויסברעכן אויב די געשפרעכן פאלן דורך.

וואס איז די "פיקעקס מאונטעין"?

די פראגע ווערט געפרעגט, וואס פונקטליך איז די פיקעקס בארג און פארוואס ווערט עס כסדר דערמאנט? דאס איז א שטארק-באוואכטע אונטערערדישע קאמפלעקס נעבן די 'נאטאנז' ענריטשמענט פאסיליטי אין צענטראל איראן. מערב וועלט שפיאנאזש אגענטורן פארדעכטיגן אז דארט ווערן געהאלטן צענטריפיוזשעס און נוקלעארע מאטעריאלן, און די אינטערנאציאנאלע אטאמישע אגענטור (IAEA) האט לעצטנס באמערקט פרישע בוי-ארבעט און טונעל גראבונגען אויפן ארט.

טראמפ'ס זיכערע טאן האט אבער אויך אויפגעברענגט פראגעס, וויבאלד ער האט געזאגט אינעם אינטערוויו אז "עס איז נישט געווען קיין שיסערייען פאר חדשים", אינעם זעלבן טאג וואס די אטאקע אויף קעשם איילענד איז באריכטעט געווארן.

די גרויסע פראגעס יעצט זענען צי די דיפלאמאטישע געשפרעכן וועלן זיך האלטן, צי וואשינגטאן איז טאקע גרייט צו אטאקירן א סייט וואס איז אזוי טיף באגראבן אונטער דער ערד, און ווי אזוי איראן וועט רעאגירן אויב דאס פאסירט. דערווייל זאגט טראמפ אז מען יאגט זיך אין ערגעץ נישט, אבער ער האט קלארגעמאכט אז א געצילטע מיליטערישע אקציע איז נאך אלץ אויפן טיש.