כינע שיסט סוקסעספול ארויף 18 סעטעלייטס מיט איין ראקעט אלס טייל פון איר קאנקורענץ צו 'סטארלינק'

די כינעזע "קינעטיקא-2 Y2" ראקעט האט זיך היינט געהויבן אין די לופטן אום 8:15 אינדערפרי (ארטיגע צייט אין בעידזשינג), טראגנדיג מיט זיך א פלאטע פון 18 סעטעלייטס וואס זענען א טייל פון די "קיאנפאן" (Qianfan) פאלאר-ארביט פראיעקט.

דראמאטישע ווידעאו בילדער פונעם ארויסשיס צייגן ווי די ראקעט צינדט זיך אן אויפן לאנציר-פלאטפארמע אינעם מדבר, מיט מאסיווע מאראנצן-קאלירטע רויך וואס פליט איבער די ערד. נאכפאלגנדע בילדער צייגן ווי די ראקעט הייבט זיך אקעגן די העלע פרימארגן זון. די קעפשען אויף די בילדער ליינט זיך: "דער פרימארגן-ליכט שפאלט דעם מדבר. אכצן שטערנס נייען דעם הימל." באריכטן פונעם ארויסשיס באשטעטיגן אז אלע 18 סעטעלייטס זענען סוקסעספול אנגעקומען צו זייערע געפלאנטע ארביטן אין ספעיס.

די מיסיע איז נאך א קלארע שריט אין די בוי-ארבעט פון כינע'ס סעטעלייט אינטערנעט נעצווערק, וואס ווערט אפט פארגליכן צו אילאן מאסק'ס "סטארלינק", און עס טראגט א ספעציעלע וויכטיגקייט פאר די ראקעט זעלבסט. די קינעטיקא-2 ראקעט איז דעוועלאפט געווארן דורך די קאמערציאלע ספעיס פירמע "קעס ספעיס" (CAS Space), און די יעצטיגע פלי ווערט באצייכנט אלס איר ערשטע גרויסע סעטעלייט אינטערנעט מיסיע.

באריכטן געבן אן אז א נייע מעכאניזם האט ארויסגעלאזט אלע 18 סעטעלייטס אין די זעלבע סעקונדע, אנשטאט זיי ארויסצולאזן איינס ביי איינס ווי ביז יעצט. דאס קען מאכן אז קומענדיגע ארויסשיסן זאלן זיין פיל שנעלער און גרינגער. דאס ברענגט ארויף די פראגע ווי שנעל די "קיאנפאן" נעצווערק קען וואקסן און וויפיל נאך אזעלכע גרופעס סעטעלייטס גייען ארויפגעשיקט ווערן אין די נאענטע צוקונפט.

לויט באריכטן פלאנט "קעס ספעיס" ארויסצושיקן נאך א קינעטיקא-2 ראקעט מיט פרישע 18 קיאנפאן סעטעלייטס דעם קומענדיגן דעצעמבער, כאטש וואס דער סקעדזשועל איז נאכנישט אפיציעל באשטעטיגט געווארן.