פאלשע בילדער פון מארס גייען וויירעל: וויאזוי זעט באמת אויס דער נאכט-הימל אויפן רויטן פלאנעט?

איר האט עס ווארשיינליך שוין ערגעץ געזען: אן עלנטע 'ראווער' פארמיטל פארהאנקערט אויף רויטע שטיינער, בשעת אן אומגלויבליכע פאנאראמע פון שטערן און די 'מילקי וועי' באלייכטן דעם הימל פון אויבן, וואס דארף כביכול פארשטעלן דעם נאכט-הימל אויף מארס דירעקט פון 'נאסא'.

די רעאליטעט איז אבער ווייט פון דעם. איין ברייט-פארשפרייטע ווידיאו וואס איז ארויפגעלייגט געווארן אויף א טיק-טאק אקאונט אונטערן נאמען "nasa.curiosity", קאמפליט מיט א נאסא לאגא, האט זיך ארויסגעשטעלט צו זיין א פאלשע, געדיטעטע קליפ וואס האט אריינגענארט טויזנטער צושויער און אפילו עטליכע נייעס וועבזייטלעך.

אן אנדערע באקאנטע בילד וואס צייגט די 'מילקי וועי' איבער די 'פערסעווירענס' ראווער, האט באקומען מער ווי 1.6 מיליאן 'שערס'. דאך האט דער מאכער פונעם בילד מודה געווען אז ער האט פשוט צוזאמענגעשטעלט עכטע בילדער פונעם ראווער מיט א בילד פונעם הימל פון אן אנדערע פלאץ, און עס רעפרעזענטירט בכלל נישט וויאזוי מארס זעט אויס. א ספעציאליסט ביי נאסא האט אויך באשטעטיגט אז די קאמערעס אויף די ראווערס קענען פשוט נישט כאפן אזעלכע קלארע און דעטאלירטע בילדער פונעם נאכט-הימל.

אבער דא קומט דער טוויסט: עכטע בילדער פונעם נאכט-הימל אויף מארס עקזיסטירן יא, און זיי זענען אינטערעסאנט אויף זייער אייגענעם שטייגער.

אין יאר 2004 האט נאסא'ס 'ספיריט' ראווער געכאפט א בילד מיט א פינף-מינוטיגע 'עקספאוזשער', וואו די שטערן זעען אויס ווי שטרייכן צוליב וואס דער פלאנעט דרייט זיך, מיט קאסמישע שטראלן וואס זעען אויס ווי קליינע פונקטן פון ליכט. אין 2014 האט די 'קיוריאסיטי' ראווער געכאפט א בילד פונעם פלאנעט ערד און אונזער לבנה, וואס זעען אויס ווי צוויי ליכטיגע שטערן ארום 80 מינוט נאכן זונאונטערגאנג, פון א ווייטקייט פון בערך 99 מיליאן מייל. און אין 2017 האט די 'אפערטוניטי' ראווער אויך פאטאגראפירט שטערן פונעם מארס אויבערפלאך.

די דאזיגע בילדער זענען אבער אומקלאר און מער וויסנשאפטליך ווי שיין, וויבאלד די ראווערס זענען געבויט געווארן צו שטודירן שטיינער און זאמד, און נישט פאר פראפעסיאנאלע פאטאגראפיע. דעריבער, דאס קומענדיגע מאל וואס א הערליכע קליפ פונעם "מארס נאכט-הימל" קומט אונטער אייערע אויגן, פרעגט זיך נאך ווער עס האט עס באמת געמאכט, ווייל די עכטע רעאליטעט איז שוין אינטערעסאנט גענוג.