בס"ד

פרעזידענט טראמפ זאגט פאר א שנעלע זיג אין די איראנער מלחמה: "מיר גייען געווינען זייער בקרוב"

פרעזידענט דאנאלד טראמפ זאגט אז ער ערווארט אז אמעריקע זאל געווינען די מלחמה קעגן איראן "זייער בקרוב". דער פרעזידענט האט דאס געמאלדן דורכאויס אן אינטערוויו מיט 'פאקס ניוז' ביים 'פרעזידענטס קאפ' גאלף טורנאמענט וואס איז פארגעקומען אינעם מעדיינע קאנטרי קלאב נעבן שיקאגא.

"איך טראכט אז וואס עס גייט פאסירן איז אז מיר גייען געווינען די מלחמה זייער בקרוב," האט טראמפ געזאגט פאר די נייעס סטאנציע, צולייגנדיג אז די פרייזן פון אויל וועלן פאלן ווי נאר די שלאכטן קומען צו אן ענדע. ער האט אנגעוויזן אז אמעריקע האלט ביים געווינען דורך א קאמבינאציע פון שווערע עקאנאמישע דרוק און מיליטערישע אקציעס.

די קאמענטארן זענען געמאכט געווארן זונטאג, דעם לעצטן טאג פונעם גאלף טורנאמענט, וואו טראמפ האט באקומען א געמישטע אויפנאמע פונעם עולם, מיט טייל וואס האבן אפלאדירט און אנדערע וואס האבן אים אויסגעבוט.

אכט מאנאטן אין קריג

דער קאנפליקט האט אויסגעבראכן ענדע פעברואר 2026, נאכדעם וואס אמעריקע און מדינת ישראל האבן באמבארדירט איראנער נוקלעארע און מיליטערישע צילן, און עס האלט שוין יעצט אינעם אכטן חודש. דאס איז אבער נישט די ערשטע מאל וואס טראמפ קומט ארויס מיט אזעלכע פאראויסזאגונגען. קוים צען טעג אריין אין די מלחמה, האט ער עס אנגערופן א "קורצ-טערמיניגע אפעראציע" וואס וועט זיך ענדיגן "זייער בקרוב" - א מעסעדזש וואס געוויסע באאמטע האבן געזען אלס א פרואוו צו בארואיגן די אנגעצויגענע פינאנציעלע מארקעטס.

די הויכע פרייזן פון אויל זענען געווען פון די מערסט-זעעוודיגע עקאנאמישע קאנסעקווענצן פון די מלחמה, שפרינגענדיג דראסטיש אין די ערשטע פאר וואכן ווען איראן האט געשטערט די שיפס-פארקער אינעם הארמוז דורכגאס. די איראנער רעוואלוציאנערע גווארדיע האט נאך צוריק אין מארץ געמאלדן אז טעהראן, און נישט וואשינגטאן, וועט באשליסן ווען די מלחמה ענדיגט זיך. דערווייל האט טראמפ נישט אראפגעשטעלט קיין פונקטליכע צייט-פלאן פאר די זיג וואס ער זאגט יעצט פאר.