בריטישער פרעמיער מיניסטער זאגט אז איראן האט געהאט א האנט אין די אינצידענט ביי די פעירפארד לופט-באזע
גאלערי
ווידעאס
בריטישער פרעמיער מיניסטער: "שטארקע צייכנס" אז איראן איז געווען פארמישט אין א זיכערהייט אינצידענט ביי אמעריקאנער מיליטערישע באזע אין ענגלאנד
דער בריטישער פרעמיער מיניסטער ענדי בוירנהעם איז ארויסגעקומען מיט א דראמאטישע מעלדונג, זאגנדיג אז ענגלאנד האט יעצט "שטארקע אנדייטונגען" אז איראן האט געשפילט א ראלע אין א זיכערהייט אינצידענט ביי די 'רעף פערפארד' (RAF Fairford) מיליטערישע באזע אין גלאסטערשיר. די באזע ווערט באנוצט דורך די אמעריקאנער מיליטער פאר אירע 'בי-1' (B-1) באמבאדיר פליגער צו אטאקירן איראנער צילן.
דער אלארם האט זיך אנגעהויבן נאכדעם וואס פינף בריטישע מענטשן אין די צוואנציגער יארן זענען ארעסטירט געווארן נעבן די באזע, נאך באריכטן איבער פארדעכטיגטע ווייסע ווענס וואס האבן זיך געדרייט אין די געגנט. ביי די זוכונגען האט מען נישט געטראפן קיין אויפרייס מאטעריאלן, נאר בלויז גאזאלין, און אלע פינף זענען באפרייט געווארן אויף שטרענגע בעיל באדינגונגען אינדערצייט וואס די אויספארשונג גייט אן.
זינט דעמאלט איז א זעקסטער פארדעכטיגטער, א בירגער מיט סיי א בריטישע און סיי אן איראנער פאספארט, ארעסטירט געווארן אויפן פארדאכט פון גרייטן טעראר אטאקעס, וואס דאס האט אריינגעשלעפט דעם קעיס אין די מעגליכקייט פון אן אויסלענדישע רעגירונג'ס אריינמישונג.
איראן פון איר זייט האט קאטעגאריש געלייקנט סיי וואספארא שייכות, ווען איר אויסערן מיניסטער האט עפנטליך אפגעווארפן בוירנהעם'ס רייד, און די איראנער אמבאסאדע אין לאנדאן האט באשולדיגט די בריטישע מידיא אין פאלש פארבינדן טעהראן צו די ארעסטן. די קאנטער-טעראריזם פאליציי זאגט אז די אויספארשונג בלייבט קאמפליצירט און ערנסט, און נעמט יעצט אריין זעקס ארעסטן און זוכונגען אין עטליכע הייזער.
אין די זעלבע צייט האבן אמעריקאנער באאמטע באזונדער אנגעוויזן אויף א מעגליכע אויסלענדישע אריינמישונג אן אנרופן איראן ביים נאמען. אפילו פרעזידענט טראמפ האט זיך אנגערופן דערוועגן, זאגנדיג אז ער שטודירט פערזענליך וואספארא ראלע איראן האט מעגליך געשפילט.
נעמענדיג אין אכט אז די 'רעף פערפארד' באזע דינט אלס א צענטראלע פונקט אין די מערב-וועלט'ס באמבאדירונגען קאמפיין קעגן איראן, איז דער אינצידענט געווארן אן ערנסטע פראבלעם פאר זיך אליין, און עס ברענגט ארויף אומבאקוועמע פראגעס איבער ווי ווייט די מלחמה קען מעגליך גרייכן ביז אריין אין די בריטישע גרעניצן.