אמעריקאנער צענטקאם מעלדט איבער נייע "טאסק פארס אייראן געיט" אפצוהאקן איראן'ס יבשה סופליי ליניעס

די אמעריקאנער צענטראלע קאמאנד (צענטקאם) האט אונטערגענומען א פרישע קאמפיין אפצוהאקן איראן'ס סופליי ליניעס אויף די יבשה, מעלדנדיג שבת, נאוועמבער דעם 7'טן, איבער די גרינדונג פון "טאסק פארס אייראן געיט".

דער צענטקאם קאמאנדיר, אדמיראל ברעד קופער, האט פארארדנט די נייע טאסק פארס, וואס באשטייט פון אן אינערליכע שטאב פון ארום 20 ציווילע און מיליטערישע פערסאנאל באזירט אין טאמפא, פלארידע. זייער הויפט אויפגאבע וועט זיין צו ארבעטן אינאיינעם מיט אנדערע אמעריקאנער גאווערנמענט אגענטורן אפצושטעלן דעם פלוס פון פארגעשריטענע וואפן, טעכנאלאגיע, סאנקציאנירטע מאטעריאלן, און אומלעגאלע געלטער פון אריבערגיין איראן'ס יבשה גרעניצן און דעם קאספישן ים.

קופער האט ארויסגעברענגט אז דער נייער שריט קומט אלס א פארזעצונג צו די גרויסע סוקסעס פון די יעצטיגע נעיווי בלאקאדע. ער זאגט אז דאס וועט מאכן פיל שווערער פאר איראן צו פינאנצירן טעראריזם, איבערבויען זייערע וואפן פאבריקן, און צוריק אנפילן זייער מיליטערישע ארסענאל.

די נייע טאסק פארס איז א טייל פון די ברייטערע פרעשור קאמפיין וואס האט זיך אנגעהויבן מיט די נעיווי בלאקאדע אין יולי. לויט צענטקאם, האט יענע בלאקאדע שוין אפגעהאלטן איראן פון עקספארטירן מער ווי 25 ביליאן דאלער אין רויע אויל.

כאטש צענטקאם האט נישט ספעציפיצירט פונקטליך אויף וועלכע גרעניצן אדער ארומיגע לענדער די טאסק פארס וועט זיך קאנצענטרירן, האט א בילד וואס איז ארויסגעשטעלט געווארן מיט די מעלדונג אנגעצייגט אויף איראן'ס גרעניצן מיט טערקיי, אפגאניסטאן, טורקמעניסטאן און פאקיסטאן. טייל האבן עס אראפגעלייגט אויפן אינטערנעט אלס א נייע "יבשה בלאקאדע", אבער צענטקאם אליינס לייגט עס אראפ בלויז אלס א קליינע קאארדינירונג שטאב, און נישט קיין מיליטערישע קראפט וואס וועט ווערן סטאנציאנירט ביי די גרעניצן.

די מעלדונג קומט אין א צייט וואס איראן פאדערט אז מען זאל אויפהייבן די ים-בלאקאדע אלס א באדינגונג צו צוריק עפענען דעם 'הארמוז דורכגאס', בשעת דיפלאמאטן פרובירן אויסצוארבעטן אן אפמאך. די גרויסע פראגעס יעצט זענען ווי אזוי די טאסק פארס וועט למעשה קענען אינפארסירן אירע צילן אין רעאליטעט, און ווי אזוי איראן'ס שכינים וועלן רעאגירן דערצו.