נייע טעכנאלאגיע: 'עלביט' שטעלט פאר א ראדאר סיסטעם וואס לאזט פיילאטן זען דורך נעפל, רויך און טאטאלע פינסטערניש

די מדינת ישראל דעפענס פירמע 'עלביט סיסטעמס' האט אנטפלעקט איר נייע 'עקספלאר' (Xplore) ראדאר סיסטעם, א ספעציעלע טעכנאלאגיע וואס איז געבויט געווארן צו לייזן איינע פון די גרעסטע און טויטליכסטע פראבלעמען אין די מיליטערישע אוויאציע היסטאריע: העליקאפטער פיילאטן וואס פארלירן קאנטראל און קראכן צוליב שוואכע זעעוודיקייט פיל מער ווי פון פיינטליכע פייער.

אפטמאל ווען א העליקאפטער לאנדעט אין א שטויביגע אדער זאמדיגע פלאץ, אדער ווען עס איז דא א שווערע נעפל, א געדיכטע רויך אויפן שלאכטפעלד, אדער סתם א טונקעלע נאכט אן קיין לבנה, קען דער פיילאט אינגאנצן פארלירן זיין וויזיע פונעם ארומיגן שטח פונקט אין די קריטישע סעקונדעס ווען ער דארף עס דאס מערסטע. די נייע 'עקספלאר' סיסטעם איז ספעציעל דעזיינט צו האלטן דעם פיילאט'ס וויזיע קלאר, אומאפהענגיג אין די שווערע אומשטענדן אינדרויסן.

ווי אזוי עס ארבעט:
די סיסטעם ארבעט דורך דורכדרינגען שטויב, נעפל, רויך און וואלקענעס, און עס מאכט א מאפע פונעם גאנצן ארומיגן שטח און אלע שטרויכלונגען אין ריעל-טיים. דאס בילד ווערט דאן ארויפגעשמירט דירעקט אויפן פיילאט'ס העלמעט סקרין. אנשטאט זיך צו ספראווען מיט א בלינדע אדער אומקלארע סביבה, פליט דער פיילאט מיט א קלארע, העלע בילד פונקט ווי אינמיטן העלן טאג, אפילו ווען אינדרויסן איז די מצב סכנות'דיג.

דאס ערמעגליכט צו פליען גאר נידריג צו דער ערד, צו נאוויגירן זיכער אפילו ווען די דזשי-פי-עס (GPS) סיסטעם ארבעט נישט אדער ווערט געבלאקט דורך די פיינט, און עס גיט כסדר'דיגע ווארענונגען איבער אפהאלטן אויפן וועג ביזן זיכערן לאנדונג. אין א פראמאציע ווידעא וואס די פירמע האט ארויסגעגעבן, קען מען זען ווי די טעסט פליגערס נוצן די סיסטעם וואס קאמבינירט ראדאר, סעטעלייט און אינפרא-רויט דאטא אויפן העלמעט, און צייגט פונקטליך אן אלע שטרויכלונגען.

וואס מאכט די 'עקספלאר' סיסטעם אזוי ספעציעל, לויט 'עלביט', איז איר קליינע סייז, לייכטע וואג, און ביליגע פרייז. דאס מיינט אז מען קען גרינג אינסטאלירן די נייע טעכנאלאגיע אויף עקזיסטירנדע העליקאפטערס אן קיין טייערע איבערבוי.

פאר מיליטערישע און רעטונגס אגענטורן איז דאס א געוואלדיגע בשורה: מען קען פליען איבעראל און אין יעדע צייט, אומגעקוקט אויפן וועטער אדער רויך אויפן שלאכטפעלד. אין א צייט וואס מאדערנע מלחמות קומען מער און מער פאר אין קאמפליצירטע שטחים וואו GPS ווערט אפגעשטעלט און די זעעוודיקייט איז שוואך, איז אזא סיסטעם א קריטישע געצייג וואס וועט ראטעווען די לעבנס פון פיילאטן און העלפן דורכפירן מיסיעס אפילו ווען די וועלט אינדרויסן ווערט אינגאנצן פינצטער.