בס"ד 

ווי ארויסגעשניטן פון א סייענס-פיקשאן פילם: כינעזער קאמפאני שטעלט פאר א 'פליענדיגע סקעיטבאורד'

א כינעזער סטארט-אפ קאמפאני מיטן נאמען "קול-פליי" (CoolFly) האט אנטפלעקט א נייע פליענדיגע מאשין וואס זעט אויס ווי ארויסגענומען פון א סייענס-פיקשאן פילם. די מאשין, וואס ווערט אנגערופן "אורבאן" (Urban) אדער די "לופט סקעיטבאורד", איז א פלאטפארמע אויף וואס מען שטייט און מען פליט אין די לופטן.

אנשטאט פליגלען אדער א נארמאלע קאקפיט, איז די מאשין א פלאכע פלאטפארמע אין די פארעם פון א בלום, ארום 3.5 מעטער ברייט. עס האט פיר מאטארן באהאלטן אינעווייניג, באשיצט מיט א ספעציעלע גריל פאר זיכערהייט. ווי אזוי ארבעט עס? דער פאסאזשיר שטעלט זיך פשוט אינמיטן, און בייגט זיך צו די זייט וואו ער וויל פליען. א ספעציעלע "עי-איי" (AI) סיסטעם שפירט די גראוויטי און באוועגונג פונעם מענטש און קאנטראלירט דעם ספיד און דירעקשאן אויטאמאטיש.

לויט די קאמפאני קען עס טראגן א מענטש ביז 90 קילאגראם (ארום 200 פונט) און ביז 1.9 מעטער הויך. עס קען פליען מיט א ספיד פון ביז 70 קילאמעטער א שעה, און איין טשארדזש האלט פאר ארום 11 מינוט צו פליען.

וואס מאכט דעם פליגער אזוי אינטערעסאנט איז ווי גרינג עס איז צו נוצן. די קאמפאני זאגט אז מען קען זיך אויסלערנען ווי אזוי עס צו קאנטראלירן אין קוים 10 מינוט. וויבאלד עס פאלט אונטער די קאטעגאריע פון גאר-לייכטע פליגערס, פעלט בכלל נישט אויס קיין פיילאט לייסענס עס צו פליען. דאס האט געמאכט א גרויסע שטורעם אויפן אינטערנעט, וואו מען זעט ווידיאוס ווי מענטשן פליען דערמיט נידריג איבער פעלדער און גאסן. כדי צו בארואיגן די קאסטומערס אז דאס איז א זיכערע כלי, האבן זיי אריינגעלייגט עטליכע דאפלטע זיכערהייט סיסטעמען וואס קאנטראלירן דעם פליגער אין פאל עפעס גייט קאליע.

די קאמפאני ארבעט שווער צו ווייזן אז דאס איז נישט סתם א שפילצייג. זיי האבן שוין באקומען אינשורענס פון גרויסע כינעזער אינשורענס קאמפאניס, סיי פאר דעם מאדעל און סיי פאר זייער אנדערע מאדעל "דריעם" (וואו מען זיצט). דער פליגער איז שוין געווארן געוויזן ביי גרויסע אינטערנאציאנאלע אויסשטעלונגען, אריינגערעכנט ביי די CES 2026 אין לאס וועגאס און ביי א גרויסע עיר-שאו אין וויסקאנסין, וויבאלד די קאמפאני פלאנט עס צו פארקויפן אויך אינדרויסן פון כינע. ביי איין פובליק דעמאנסטראציע אין כינע, האבן צוויי אזעלכע מאשינען געפלויגן אין די לופטן ביי א פרעסט קעלט פון 30 גראד אונטער זערא (סעלסיוס), אינאיינעם מיט פייערוואורקס.

אבער נישט יעדער איז איבערגענומען. קריטיקירער ווייזן אן אז די טעכנאלאגיע איז נישט קיין נייע המצאה, און עס זעט אויס פונקט ווי א פליענדיגע פלאטפארמע וואס די אמעריקאנער מיליטער האט שוין דעוועלאפט צוריק אין די 1950'ער יארן. אנדערע פרעגן אויך צי די "עי-איי" סיסטעם איז טאקע אזוי פארגעשריטן, אדער ס'איז פשוטע סענסארס וואס מען נוצט שוין יארן. 

טראץ די קריטיק, זאגט די קאמפאני אז זיי גייען אנהייבן מאסן-פראדוקציע נאך דעם יאר. זיי צילן עס בעיקר פאר פארוויילונג, קורצע רייזעס אין שטאט, און טוריזם, און נישט פאר לאנגע טעגליכע קאמיוטס.