אמעריקאנער מאנאפאל אויפ'ן אינטערנעט: די איינציגסטע קאמפאני וואס האלט אויף די גלאבאלע קאמיוניקאציע נעצן

כמעט די גאנצע אינטערנאציאנאלע אינטערנעט טראפיק איז אנגעוויזן אויף א נעצווערק פון אונטערוואסער 'פייבער אפטיק' קעיבלס. אבער וואס אסאך ווייסן נישט איז, אז עס איז פארהאן בלויז איין איינציגע אמעריקאנער קאמפאני וואס קען סיי פראדוצירן און סיי אינסטאלירן די דאזיגע קעיבלס.

די קאמפאני, באקאנט אלס "סאבקאם" (SubCom), אפערירט א 73-יעריגע פעקטארי אין ניו העמפשיר, וואו זיי פראדוצירן די גאר לאנגע קעיבלס וואס פירן הונדערטער 'טעראבייטס' פון דאטא יעדע סעקונדע דורך יעדע פייבער שטריקל. נאכ'ן פראדוצירן, ווערן די קעיבלס ארויפגעלייגט אויף ספעציעלע שיפן וואס לייגן זיי אויס אויפ'ן טיפן אקעאן באדן, וואס דאס באהעפט קאנטינענטן און האלט ביים לעבן די גאנצע דיגיטאלע וועלט.

צווישן די קאסטומערס פון די קאמפאני ציילן זיך די גרעסטע טעכנאלאגיע ריזן ווי גוגל, מעטא, עמעזאן, און מייקראסאפט. די דאזיגע פירמעס זענען פאראנטווארטליך פאר ארום 75 פראצענט פון די גלאבאלע דאטא פארלאנג, וואס ווערט בעיקר געטריבן דורך 'ארטיפישעל אינטעלידזשענס' (AI) און 'קלאוד קאמפיוטינג'. מיט די שנעלע וואוקס פון די טעכנאלאגיעס, איז די דרוק אויף די פראדוקציע ליניעס און שיפן פון 'סאבקאם' שטארק געשטיגן.

דער פאקט אז אזא קריטישע קראפט איז קאנצענטרירט אין איין פירמע ברענגט ארויף ערנסטע פראגעס איבער די זיכערהייט און סטאביליטעט פונעם אינטערנעט. ארום 99 פראצענט פון אינטערנאציאנאלע אינטערנעט טראפיק פארט נאך אלץ דורך די אונטערוואסער קעיבלס ענדערש ווי דורך סעטעלייטס, וויבאלד סעטעלייטס קענען דערווייל נאכנישט נאכקומען די קאפאציטעט אדער פארלעסליכקייט פון פייבער אפטיק.

די קעיבלס קענען געשעדיגט ווערן דורך שיף-אנקערס, נאטורליכע קאטאסטראפעס, אדער בייזוויליגע סאבאטאזש, און די ריפעירס קענען אפטמאל נעמען וואכן אדער אפילו חדשים. דער פאקט אז 'סאבקאם' איז סיי דער פראדוצירער און סיי דער אינסטאלירער גיט פאר די פאראייניגטע שטאטן א זעלטענע סטראטעגישע כח, אבער פון די אנדערע זייט מיינט עס אז סיי וועלכע שטערונג ביי זייער ניו העמפשיר פלאנט אדער ביי זייער פלאטע פון שיפן, קען האבן א קאטאסטראפאלע עפעקט אויף די גלאבאלע נעצן.

די ארבעט פון די קאמפאני בלייבט מערסטנס אומזעיבאר פארן טעגליכן באנוצער, אבער די גאנצע אנליין עקאנאמיע ליגט למעשה אויף די דינע גלאזערנע שטריקלעך וואס זיי פראדוצירן און לייגן אויפ'ן אקעאן באדן.